Swnghihhuz dwg Yauhi aen gingjdenj gyaeundei raixcaix ndeu, Suenmbuheu dwg ndawde gizdieg ceiq gyaeu.

Daeuj daengz Suenmbuheu, daj gyae muengh bae, ndaw daemz hunghung haenx, baenz benq baenz benq mbawmbu deih- yaedyaed, doxcaenx doxnem, lumj gaiq deihdamj heusoemsoem ndeu, cungqgyang siuq rim baenz duj baenz duj va’mbu ronghsien. Raq rumz saeq baez ci gvaqdaeuj, va’mbu caeuq mbawmbu diuqfoux fofo, lumj banh ciengz vujvei nauhnauh yiedyied ndeu.

Caiq byaij gyawj di, couh engq raen cing lo. Mbawmbu lumj aen batluenz heu, youh lumj aen liengj heuswd, aen nem aen, gij raemxraiz gwnz mbaw, ringx bae ringx dauq, lumj naedcaw mae goenq. Gij saek va’mbu miz hau, miz maeq, gij hau lumj nyawh, gij maeq lumj fwjbya, miz mbangj lij dwg valup, miz mbangj mbehai song sam limq, lumj gij rangz fwndoek gvaq haenx, bongzboedboed, miz mbangj gaenq hai caez lo. Rumz cififi, rangfwfwd hawj vunz simsoeng vuenheij.

Ngonz aen Suenmbuheu gyaeundei neix, gou ngeix daengz gawq sei ndeu “lwgnyez vad ruz iq, caeg mbiq duj va’mbu”, gou caen siengj baenz boux lwgnyez ndaw sei neix ha! Gou gyaez aen Suenmbuheu gyaeundei neix!

（Yangz Yijloz raiz； Goenggen hoiz）