Ngoenz gonq gyanghaemh, gou yaek ninz ndaek seiz, sawqmwh dingqnyi gij sing geizheih. Seizneix, gou hix mbouj siengj ninz, cij siengj ra ok gij sing dwg daj gizlawz daeuj. A! Gou ra ndaej lo——gij sing dwg daj ndaw gvihbuh cienz ok- daeuj. Gou caiq daengj rwz bae dingq, yenzlaiz dwg diuz vunj gou ngamq cawx ndaej mbouj nanz caeuq diuz vunjiq gou seiq bi gonq daenj gvaq haenx cingq gangjvah laeglemx ne.

Vunjmoq daxndiep dwk cam:“Gwnz ndang mwngz vih gijmaz yienghneix uq ne?”Vunjiq mbouj miz banhfap dwk naeuz:“Ai, gou yenzlaiz hix lumj mwngz ityiengh hausagsag, gyaeundei raixcaix! Seizhaenx bouxcawj cibfaen gyaez gou, ca mbouj lai ngoenzngoenz daenj gou bae hwnjhag. Hoeng miz baez ndeu, gwnzmbwn laebdaeb doek geij ngoenz fwn. Bouxcawj hwnjhag itdingh ginggvaq diuz loh ngutngut ngeujngeuj gumzgumz gamxgamx, yaep he bienq ndaej gig myag. Bouxcawj daenj gou bae yozyau seiz, namhhenj couh lumj nonroet riengz nei nem daejhaiz bouxcawj, boengz hix mbouj duenh yiengq gou coemj daeuj, ceiq cuij dwg, aenvih gij namh daejhaiz bouxcawj yied rom yied lai, yamqdin yied daeuj yied naek, doeklaeng mbouj re couh laemx roengzbae, lij rouxringx youq gwnznamh. Gwnz ndang bouxcawj vunqsieng baez dem baez, yienzlaiz gou hausagsag hix deng namh nyumx baenz saekhenj lo. Bouxcawj daejnauh gouz daxmeh dawz de swiq seuq seiz, hoeng guh mbouj ndaej daengz lo, aenvih doenghgij namhhenj gaenq haeuj daengz ndawndang gou lo. Daj seizhaenx hwnj bouxcawj couh caiq hix mbouj miz banhfap daenj gou lo. Gou gaenq youq ndaw gvihbuh laep- ngaungau neix ninz le sam bi lai lo, seiqgyaiq baihrog baenzlawz yiengh gou mbouj rox saekdi……”Vunjiq gangj dwk gangj dwk, gawqyienz siengsim dwk daejnganga hwnjdaeuj.

Vunjmoq dingq le gij vah vunjiq, gig doengzcingz gij bungqraen de, yienghneix couh nai de naeuz:“Mwngz gaej nanzgvaq, yienznaeuz mwngz mbouj ndaej ok dou, danhseih gou gojyij dawz gou youq baihrog yawjraen gij saeh haisim lwnh mwngz nyi! Seizneix, baihrog bienqvaq caen hung ha! Yenzlaiz mwngz riengz bouxcawj byaij gvaq gij diuzloh namhhenj haenx gaenq siu ndaej mbouj miz ingj mbouj miz riz, lawh de dwg cwngfuj ok ngaenz caiq coih diuz loh suijniz bingzrwdrwd ndeu. Seizneix bouxcawj raeuz hwnjhag mbouj dwg byaij loh bae, lij dwg naengh ci bae, vunz ndaw mbanj ndaem ok gij doxgaiq cungj yungh ci hung yinh ok baihrog bae vuenh ngaenz. Swnghhoz gyoengqde yied daeuj yied miz lo. Ndaw mbanj ranzngvax gaxgonq cungj bienqbaenz ranzlaeuz lo. Mwngz yawj bouxcawj raeuz youq gij song caengz ranzlaeuz haenx youh rongh youh gvangq, gwnzdieg lij nem miz cienmeng, gingciengz cat ndaej hausagsag, ranz dingj lij miz daeng gyaeundei, lumj dujva hung nei……”

Dingq le gij vah laeglemx vunj moq caeuq vunjiq, ndaw sim gou haujlai nanz dingz mbouj roengzdaeuj. Dwg ha, danghnaeuz mbouj miz cwngfuj ok ngaenz bang raeuz coih loh, danghnaeuz mbouj miz cwngfuj bang gaijcauh ranzyiemj laj- mbanj, baenzlawz miz gij swnghhoz vuenyungz raeuz? Youq gyanghaemh caemrwgrwg neix, gou caen siengj singhung ciengq song coenz: “Cwngcwz dangj caen ndei ya! Cwngcwz dangj caen ndei ya!”

（lauxsae son’gyauq Cinz Yivangj/覃玉往）