Cibroek

Aen singgiuz daihcaet couhdwg deihgiuz.

Deihgiuz daegbied lai bw! Youq baihgwnz de miz it bak it cib it boux guekvuengz(guekvuengz bouxndaem goj suenq haeuj bae), caet cien boux canghdeihleix, goujcib fanh boux canghgiyez, caet bak hajcib fanh boux laeujgeq, sam ik it cien it bak fanh boux vunzluemjrog, song ik lai boux vunz.

Vihliux hawj gyoengqsou rox deihgiuz laux baenz yienghlawz, gou yaek naeuz gyoengqsou nyi: Gaxgonq caengz miz dienhdaeng, youq gwnz roek aen couhung, bouxdiemjdaeng miz seiqcib roek fanh song cien haj bak itcib it vunz.

Daj gizgyae yawj bae, de ndeiyawj dangqmaz. Gyoengq vunz de ningcak cix lumj fouxbahleiz ndaw ranzfwenheiq nei, caezcaez cingjcingj. Bouxdiemjdaeng Sinhsihlanz caeuq Audaliya sien okdaeuj, citdawz aendaeng le, gyoengqde cix bae ninz lo. Riengzlaeng cix daengz boux- diemjdaeng Cungguek caeuq Sih- bwzliya hwnj daiz, gyoengqde biuj- yienj liux couh roengz daiz bae. Riengzlaeng cix daengz bouxdiemj- daeng Ngozlozswh caeuq Yindu. Riengzlaeng cix daengz bouxdiemj- daeng Feihcouh caeuq Ouhcouh. Liux cix daengz bouxdiemjdaeng Nanz- meijcouh, doeksat cix dwg boux- diemjdaeng Bwzmeijcouh. Gyoengqde ciuq gonqlaeng okdaeuj, mbouj loengca gvaq saek baez, ak dahraix bw!

Bwzgiz miz aen daeng ndeu ndwi, Nanzgiz hix miz aen daeng ndeu ndwi, bouxdiemjdaeng Bwzgiz caeuq Nanzgiz youq vangq youq soeng, aenvih gyoengqde bi daengz gyaeuj guhhong song baez ndwi.

Cibcaet

Langhnaeuz vunzlai gangj vah yaek gangj ndaej lai mizyinx di, yienghneix gyoengqde cix mbouj dwg coenzcoenz gangj caen bw. Gou lwnh gij saeh bouxdiemjdaeng hawj gyoengqsou nyi, couh mbouj dwg coenzcoenz gangj caen bw, aiq rox hawj doenghgij vunz mbouj rox deihgiuz de naemj loeng bae. Youq gwnz deihgiuz, dieg vunz iq raixcaix, langhnaeuz ngeihcib ik boux vunz- biengz gwnz deihgiuz bouxboux cungj ndwn hwnjdaeuj, caemhcaiq lumj haihoih yienghde boux depgyawj boux dem, yienghneix ranghdieg raez ngeihcib ingleix gvangq ngeihcib ingleix raez ndeu cix coux ndaej doenghgij vunz neix liux lo. Vuenh coenz vah ndeu ma gangj couhdwg aen dauj iq gwnz Daibingzyangz ndeu cix gyonjcomz vunz lajmbwn ndaej liux.

（22）