Youq laj mbonq iq, miz ga madva bouxcawj iq vuenh roengzdaeuj ndeu.

Gyanghwnz, ga madva deng duz nouhung ndeu rag bae lo.

Duz nouhung madaengz ranz le, yiengq gyoengq duz noulwg vadvad fwngz, singq hung dwk hemq naeuz:“Vaiq daeuj yawj, gou gip ndaej aen daehhung ndeiyawj ndeu bw!”

“Hawj gou! Hawj gou!” gyoengq duz noulwg sikhaek buet gvaqdaeuj ciengj madva. Gyoengqde mwngz beng gou rag, rag ndaej ga madva raez- rangrang, iet daengz henzdou bae.

“Mbouj cauz! Mbouj cauz!” Duz nouhung naeuz, “Dawz de guh aen ci, gou soengq sou bae laj gofaex hung guhcaemz, ndei lwi?”

“Ndei! Ndei!” Gyoengq noulwg duz riengz duz, ndonjhaeuj gyang mad bae. Duz nouhung aemq hwnj ga madva buet hwnjdaeuj, aenbak hemq:“ Vu! Hai ci lo!”

Duz nouhung doq buet doq ciengq go, “Aenci buet ndaej vaiq youh vaiq. Vu……Vu! Gvaq le camh youh camh……”

“Saefouh! Saefouh!” Gyoengq nou- lwg cam, “Daengz laj gofaex hung caengz?”

“Caengz! Caengz!” Duznou hung doq buet doq dap.

“Daengz caengz? Daengz caengz?” Gyoengq noulwg youh cam.

“Caengz! Caengz!” Duznou hung doq buet doq dap.

“Vihmaz lij caengz daengz ne? Baenzneix gyae!” Gyoengq noulwg iet le iet hwet, raurumz hwnjdaeuj, “Aenci mbouj miz conghcuengh, laep lai, yawj mbouj raen baihrog.”

“Hai congh! Hai congh!” Gyoengq noulwg gangj sat couh yungh heujsoem gaet byoengq le madva. Ha, baenz aen baenz aen conghcueng hai ndaej lo, gyoengq noulwg duz dem duz iet gyaeuj okdaeuj, doiq youh doiq lwgda yaep ha yaep, yawj ha yawj:“O，yaek daengz gofaex hung lo!”

“Vu, daengz lo!” Duz nouhung cuengq roengz ga madva, hemq, “Caezgya roengz ci lobw!” Gyoengq noulwg daj ndaw congh madva ndonj okdaeuj, duz riengzlaeng duz, bae laj goek gofaex hung guhcaemz lo.

Mbwn rongh lo, mbouj rox bouxlawz gip hwnj le ga madva, venj hwnj nyefaex bae. Gyoengqvunz raen le cungj roxnyinh geiz- gvaiq liux: Yo! Ga madva moq vihmaz miz baenzlai aen congh iq ne?

(Vuz Gyungj raiz Ouh Caijfangh hoiz)