Ndaw ndoengfaex miz golinzgaeq ndeu, miz ngoenz ndeu daxmeh golinzgaeq doiq bouxlwg bonjfaenh naeuz:“Mwngz gaenq maj hung lo, mbouj ndaej caeuq daxmeh caemh gwn caemh youq lo, mwngz yaek gagdog bae ndaw seiqgyaiq baihrog gag lixyouq lo.” Naeuz sat, daxmeh cingjgouz rumz daxbuz soengq lwg de bae, rumz daxbuz baez cifefe couh ci de deuz lo, lij hawj de an diuzcoh heuh guh Lozloz.

Lozloz youq byonghmbwn mbin bae mbin dauq, de mbin gvaq le doenghnaz heusoemsoem, yawjraen le nungzminz daxlungz youq ndaw reihnaz dwgrengz guhhong; loh gvaq diuz gai nauhyied hawsingz, yawjraen aenlaeuz sangvidvid caeuq baenz gyoengq ci buetfofo; roebraen le gij roeglwg ngamq hag mbin haenx, ginggvaq baez youh baez saetbaih, doeklaeng hag rox mbin lo, yienghneix youq byonghmbwn caeuq gij roeg wnq doxdax byawz mbin ndaej sang, mbin ndaej gyae; de lij ngonzyawj gvaq gij va moq gyaeundei ndaw lueg caeuq baenz gyoengq duzmbaj diuqfoux yengyeng.

Sawqmwh ndaw lueg bongj hwnj raq rumz ndeu, youh dawz Lozloz ci daengz aen mbanj ndeu, menhmenh, menhmenh, doek youq ndaw fwngz laeq lwgsai ndeu, lwgsai angqvauvau gaem dawz de, roebraen gij lwgnyez doih de, gyoengqde doxyaeng caeuq de itheij bae ra haujlai golinzgaeq, gyoengqde guhdoih daeuj daengz gaiq diegnywj henzgyawj haenx, youq gizneix gyoengqde ra raen le haujlai golinzgaeq hausubsub. Gyoengq nyezdoih mbaet gij golinzgaeq roengzdaeuj coux haeuj aen hab iq ndeu. Neix couh dwg “aensuen golinzgaeq”, aenvih gaiq diegnywj neix did rim golinzgaeq, cipdaeuj gyoengq lwgsai dawz gij golinzgaeq ndaw hab haenx ndaem roengz ndaw namh bae, riengz seizgan ciemh ngoenz ciemh gvaqbae, golinzgaeq itheij didrag, okngaz, majhung. Lozloz youq duenh roen gvaqdaeuj neix cingqcaen roxnyinh le gij dauhleix naedceh byoengq namh okdaeuj neix, hag rox le gij cingsaenz giengiengz、 maenh’ak、 roengzrengz haenx.

(Don Yauz raiz Goenggen hoiz)