环江毛南族自治县思恩镇人和小学五年级 Moz Vwnzdauh/莫文涛

Mboengqneix gou miz fuk doeg le bien faenzcieng ndeu, heuhguh 《Lauxsae Lajmbanj Ceiq Gyaeu Cih Yezyingh》. Gij saeh de gig gamjdoengh vunz, gvaiq mbouj ndaej de dangsenj 2016 nienz “doenghboux gamjdoengh Cung- guek”.

1980 nienz, lwgsau hawsingz Cih Yezyingh 19 bi seiz, mbouj goq vunz ndaw ranz de fanjdoiq, boux vunz dog daeujdaengz Gyanghsih Bwzyangz Siujyoz sonsaw. Gizhaenx dwg aen gyauyozdenj, cij miz boux lauxsae ndeu. Gizhaenx diuzgen gig sinhoj, cij miz aen gyausiz vaihvadvad ndeu, mbouj doeng goengloh, mbouj miz dendwngh, mbouj miz swlaizsuij……Hoeng de mbouj miz saekdi vah ienqhaenq, vihliux daengzcog son ndei lwgnyez lajmbanj, de mbouj ok sing dwk youq roengzdaeuj lo, baez youq couh dwg geijcib bi, daj bi haenx Cih dacej bienqbaenz Cih daxbuz, vih beixnuengx lajmbanj gung le buek damq buek vunzcaiz.

Doeg gij gojgaeq Cih Yezyingh, gou couh gag siengj daengz Cinz lauxsae, de son dou yijvwnz. De dwg swhfan bizyezswngh, de ndang reux, gij naj hoengzuu, gij Vahgun de gangj ndaej ndei, miz haujlai yozyau hawsingz cungj ceng aeu de bae sonsaw, hoeng de gvaqniemh gyoengq lwgnyez beixnuengx lajmbanj. Gyoengqde gig maq- muengh yozyau ndaw mbanj faenboiq ndaej boux swhfan bizyezswngh ndeu, hawj lwgnyez lajmbanj hix ndaej ciep daengz gyauyuz ndei,yienghneix de gietdingh ma daengz mbanjranz swhgeij, hainduj le guh hong sonsaw de.

Haetromh, diuz nditrongh daih’it ciuq daengz gwnz dieg, ndaw yozyau gyoengq lauxsae couh nyaengq hwnjdaeuj lo. Lauxsae doxlwnz daengz fandangz cawjngaiz hawj hagseng gwn, nyaengq mbouj dingz: Raemjfwnz、catrek、 cauxfeiz、 cawj ngaizhaet…… Loengh dwk daengx gyaeuj cungj dwg hanh hix mbouj haengj yietnaiq, Cinz lauxsae caiq hoj caiq naiq hix mbouj miz saekdi vah- ienq, vihliux hawj dou gwn gaemz ngaizhaet ndatfoedfoed. Diegyouq dou youq henzgyawj yozyau, miz mbangj doengzhag diegyouq liz yozyau miz sam seiq leix gyae, miz mbangj doengzhag diegyouq liz yozyau miz caet bet leix gyae. Haetromh dou daj ranz byaij daengz yozyau gaenq dwgrengz naetnaiq、 dungxiek raixcaix lo. Vihliux hawj dou fuengbienh, gyoengq lauxsae cij boux guh lai yiengh hong. Gaenq dwg lauxsae youh guh bouxdajcawj, aenvih seizneix daihbouhfaenh bouxcoz lajmbanj cungj ok baihrog guhhong lo, ndaw mbanj cij miz bouxlaux caeuq lwgnyez, ra mbouj ndaej vunz daeuj bang dou cawjngaiz. Yienghneix daihbouhfaenh hagseng bienqbaenz lwgnyez louzsouj, gyoengqde gig maqmuengh ndaej daengz gij gvensim bohmeh ha! Cinz lauxsae couh dwg bohmeh caen dou, yozyau dwg ranz raeujrub dou. Youq gizneix, dou gamjdaengz gij ranz raeujrub: Dungxiek le, miz ngaiz ndatfoedfoed gwn; baenzbingh le, miz Cinz lauxsae buenx bae yihyen yawjbingh; mbwn nit le, miz Cinz lauxsae daezsingj gya daenj buhvaq; ngeix mbouj doeng, miz Cinz lauxsae son; baez bungz daengz mwh fwnraq, miz Cinz lauxsae soengq ma ranz…… Ndawsim miz hoj yiengq Cinz lauxsae gangj, ndawsim miz angq, caeuq Cinz lauxsae caemhyiengj.

Neix couh dwg lauxsae daeng aeueiq lajmbanj, mbouj miz diegvih, mbouj miz gij yienghsiengq seizhwng baihrog, hoeng de miz aen sim ndei lumj gim henjrwgrwg ne. Lumj nonsei ityiengh mbouj ok sing fungyen swhgeij, lumj labcuk ityiengh ciuqrongh bouxwnq.

（lauxsae son’gyauq： Cinz Yivangj/覃玉往）