Youq ngoenz banhaet rumz dingh ndit rongh ndeu, duzcenh lwg byaij ok bakdou, bae ndaw ndoengfaex ra mak gwn. Doq byaij doq byaij, roeb raen douqmong lwg, douqmong lwg yawj duzcenh baez ndeu, nyaenx mbouj ndaej aj bak riuhaha, ndaengndiengq naeuz:“Duzcenh beix- nuengx, gij oen raeblaeng mwngz caen yak yawj lo, caen dwg duzyakyawj. Mwngz yawj gij bwnnaeng gou, unqnemnem.”

Duzcenh lwg dingq gij vah douqmong lwg le, cungj mbouj fatheiq, cix riuhehe doiq de naeuz: “Gou roxnyinh gwnz ndang maj oen gig ndei yawj bw, caemhcaiq yunghcawq hix gig lai ne.”

Douqmong lwg youh naeuz: “Gij oen mwngz di cungj mbouj miz yungh, gij bwn gou cij miz yungh!” Douqmong lwg engqgya ndaenggon lo.

Sawqmwh, daj ndaw caznywj saet okdaeuj duzguk yak youh ak ndeu, baez neix, douqmong lwg gaenq hwk dwk hanh rihnengneng, doq yat buet deuz, hoeng duzcenh lwg mbouj buetdeuz, cix dwg maenh’ak mienhdoiq duzguk, duzguk ndaw hoz ngeix: Gou ngoenzneix banringz lij caengz gwnz haeux ne, aendungx cungj yaek iek bej liux lo, seizneix gijgwn soengq daengz henz bak, baenzlawz ndaej cuengq deuz ni? Baezneix, duzcenh lwg dawz bonjfaenh gienj baenz aen giuzoen ndeu, ringx bae coh duzguk, duzguk caengz yawj cing gaiq ringx gvaqdaeuj haenx dwg gijmaz doxgaiq, doq coemj gvaqbae, gvaq geij miux cung, duzguk in dwk daejnganga, siengsim byaij deuz lo.

Douqmong lwg yawjyawj gij bwnnaeng swhgeij, caiq yawjyawj gij oen duzcenh, lienzmuengz buet gvaqbae docih duzcenh, naeuz: Gyo’mbaiq mwngz, duzcenh beixnuengx, danghnaeuz mbouj miz mwngz, diuzmingh iq gou couh liux lo, cingj mwngz yienzliengh gou, ndaej lwi?” Duzcenh lwg riu naeuz: “Gizsaed gou senq yienzliengh mwngz lo, mwngz yaek gyo’mbaiq couh gyo’mbaiq gij oen yakyawj gwnz ndang gou!”

Doeklaeng, douqmong lwg mingzbeg aen dauhleix yienghneix: Gij doxgaiq ndeiyawj haenx mbouj itdingh miz yungh, hoeng gij doxgaiq yakyawj haenx miz seiz yunghcawq lij gig hung ne!

(Dangz Vanjyinz raiz Goenggen hoiz)