Yahdaiq gou dwg boux mehmbwk lajmbanj ndeu, de gig bingzciengz, de 60 lai bi, mbouj sang mbouj daemq, gij byoem henz rwz gaenq miz haujlai byoemhau, hawj gou yaenqsiengq ceiq laeg dwg yahdaiq gig lauxsaed caeuq gaenxguh.

Yahdaiq miz bet boux lwg, moix bungz ngoenzciet, cungj daengz ranzdaiq doxcomz. Ngeihcib lai boux lwglan humx seiqhenz ndang yahdaiq, gwnz naj yahdaiq riu lumj va hai ne.

Hoeng moix ngoenz cawz le gwn haeux, dou ca mbouj geijlai yawj mbouj raen gij ngaeuz yahdaiq. Banhaemh, yahdaiq hawj dou ninz ndei le, de cij ninz; haetromh, yahdaiq hwnq ndaej ceiq caeux, cawj ndei haeuxromh hawj daihgya. Gwn haeux sat le, hix mbouj rox de bae gizlawz lo. Dou geij beixnuengx biuj gietdingh “gyaeprieng” yahdaiq.

Ngoenz daihngeih, gwn haeuxromh le, caenh raen yahdaiq riuj aen swx coh baihrog byaij bae. Dou bet boux beixnuengx gaenjndaet riengzlaeng yahdaiq. Yahdaiq doeksaet muengh dou:“Sou ngoenzneix baenzlawz la?” Daihgya mwngz muenghmuengh gou, gou muenghmuengh mwngz, hob bak mbouj gangj saedvah, yahdaiq roxnyinh geizheih. Daeuj daengz ndaw suenbyaek, yahdaiq couh gungj hwet baenz mbaw baenz mbaw dinq byaek, dou hix hag gij yiengh yahdaiq bang guh, ngamq yaep he, dou couh roxnyinh hwet naet ga in, hanhndat rihnangnang. Hoeng yahdaiq lij dwg fwngz mbouj dingz, din mbouj dingz. Yawj de gij yiengh baegfofo, gwnz naj hanh rihnengneng haenx, dou gig sim’in. Doenggvaq baenz ngoenz “gyaeprieng” yah- daiq, dou rox daengz yahdaiq cungj dwg baenz ngoenz nyaengq daengz laep, gig noix yietnaiq.

Yahdaiq gou gig lauxsaed, hix gig gaenxguh, gou gyaez yahdaiq gou.

(bouxraiz: Yangz Sinhyiz bouxhoiz: Goenggen)