Gangj daxboh gou gvaiq, de dauqdaej gvaiq youq gizlawz ne?

Daih’it gvaiq: Gvenhaeh de caeuq daxmeh gvaiq. Youq ndaw ranz, yawj daeuj gijmaz saeh cungj dwg daxmeh guhcawj, hoeng gizsaed gij genyi cungj dwg daxboh daez ok liux. Mwngz gangj, dauqdaej gyoengqde boux lawz cij dwg “bouxcawjranz” ne?

Daihngeih gvaiq: De maij gwn gij doxgaiq gvaiq. Gou laihnaeuz cij miz lwgmbwk maij gwn soemj, byawz siengj daengz daxboh gou hix maij gwn, caiqlix dwg yied soemj yied ndei. Vunz cungj naeuz gwn makmoiz heuj soemj lai, de cix yiemz mbouj doh soemj, mbouj gvaqyinx. Lauheiq dwg de cienz hawj gou ba, gou hix maij gwn soemj. Miz cungj makmoiz ndeu soemj dangqmaz, gou gwn gvaq aen song aen heuj couh deng unq liux lo; hoeng daxboh cix gwn le aen dem aen, gwn ndaej vanyupyup, lij itloh hemq naeuz:“Yinx! Yinx! Caen dwg yinx lai lo!” Lajmbwn gwn soemj de ceiq ak loba.

Daihsam gvaiq: De yawj gij densi gvaiq. De mbouj maij yawj densi, lienz《Sinhvwnz Lenzboh》hix gig noix yawj, hoeng de cij maij yawj gij denyingj Couh Singhciz yienj haenx dangqmaz. Cijaeu ndaw densi miz gij denyingj Couh Singhciz yienj haenx boq, couhsuenq benq denyingj neix de gaenq ndaej yawj le haujlai baez, de lij aeu caiq yawj, caiq riuhaha baez ndeu.

Daihseiq gvaiq: Maqmuengh de doiq gou gvaiq. Daxboh boux wnq cungj haemz mbouj ndaej hawj lwgnyez boujgoq bouj lai di, bae hwnj dangzyinxdaeuz hwnj lai di, daxboh gou cix nyinhnaeuz gou bae hag doh nyaengq lo, mbouj yungh caiq sai seiz bae hag gij doenghyiengh luenhlablab haenx. Daxmeh mbouj nyienh hawj gou yawj densi、hwnj muengx, gangj yingjyangj lwgda lai. Hoeng cijaeu gou gouz daxboh, daxboh haengjdingh hawj gou yawj. Sou gaej nyinhnaeuz daxboh cungh gou gvaqbouh bw, danghnaeuz gou gangj siengj bae cawx buhvaq moq roxnaeuz gij wnq, de cungj fanjdoiq, gangj buhvaq doh daenj couh ndaej lo. Mwhneix couh vuenh daxmeh “cungh” gou lo, haha!

Sou gangj, daxboh gou gvaiq mbouj gvaiq?

(bouxsij: Fouzmingz bouxhoiz: Ouh Caijfangh)