Gou haengj angjak, gij saeh bouxwnq mbouj gamj guh haenx gou gamj guh, gij saeh bouxwnq ngeix mbouj daengz haenx gou ngeix ndaej daengz. Gou caet bi couh rox bin faex, bet bi rox caemx raemx； mbon rongzroeg, gyongz rongzdoq gij saeh neix gou cungj guh gvaq, gij saeh epbya doek roengz daemz bae haenx hix miz, hix aenvih yienghneix hawj daxboh daxmeh dem mbouj noix mazfanz.

Geiq ndaej miz baez ndeu, gou caeuq daxmeh bae ranz daxdaiq. Gou ngamq daj baihrog guhcaemz haeujma, yawjraen aenrek ndaw ranzcauq cingq ok hoenz, dingjlingz laenghenz mbouj miz vunz, gou hoz ngeix mbat neix cuet lo, danghnaeuz dawz feiz couh sat lo. Aenvih gizneix dwg aen saeuq lajmbanj, laenghenz couh dwg doihaz, gig yungzheih dawz feiz. Gou baez simgip, ngeix daengz bonjfaenh dwg ndaw ranz boux vunzsai dog, gij hong ndaep feiz swhyienz doek roengz gwnz ndang gou lo. Gou ngeix daengz gizdieg miz youz haenx mbouj ndaej aeu raemx daeuj ndaep feiz, feiz coemhdawz yaekaeu miz yangjgi, caenh’aeu yungh doxgaiq gekhai couh ndaej lo. Deng, mbouj dwg miz vunz aeu denz daeuj ndaep feiz ha? Gou ngeix cungj mbouj lai ngeix, sikhaek buet haeuj ndaw rug bae, umj fan denz doq deuz. Gou ngaem gyaeuj cung haeuj ranzcauq bae, yawjraen daxdaiq youq, gou doq nyoengx de deuz, dawz baenz fan denz goemj roengzbae. Caenh dingqnyi daxbaiq “a” hemq sing ndeu, gou vaiqdi lwnh de nyi: “Daxdaiq, seizneix mbouj miz saeh lo, feiz coemh mbouj dawz lo.”“Mwngz guh gijmaz ya?”“Gou hawj gij youz ndat le daeuj cauj byaek la! Mwngz……Mwngz……Fan denz gou ya!” Gou doeksaet aj bak ngubngub……

Ngoenz haenx, daxmeh youh son gou lo, guhsaeh gaxgonq itdingh yaekaeu lai ngeixngeix, lai camcam, gaej caiq angjak lo.

(bouxraiz: Vangz Hauswnh/王浩森; bouxhoiz: Goenggen)