Miz vunz gyaez rumz, rumz seizcin raeujrub, rumz seizhah ndatcumx, rumz seizcou liengz- sangj, rumz seizdoeng nitdot. Lij miz vunz gyaez fwn roxnaeuz nae. Hoeng gou bonjfaenh cix gyaez dienheiq miz mok.

Mwh roengz mok, seiqlengq cungj bienq ndaej hausaksak. Doenghgij laeuz sang、gofaex、lohgai, gij doxgaiq henz ndang cungj ndoj haeuj gyang hausak bae liux. Seiqhenz dieg bingzciengz sug haenx bienq ndaej najseng liux, moengzmoengz loengzloengz, hawj vunz roxnyinh yaek yawjraen youh yawj mbouj raen. Aenvih miz mok, gijmaz cungj bienq ndaej mbouj caensaed hwnjdaeuj, hawj vunz roxnyinh lumj byaij haeuj le aen diegsien nei. Aen seiqgyaiq hix aenvih moengzloengz bienq ndaej engqgya gyaeundei .

Hix mbouj rox dauqdaej miz geijlai boux vunz、 geijlai gyaq ci, cij dingqnyi gij singyaem gyoengqvunz gangjriu caeuq lingzci yiengj lingling. Mwhneix gij ronghdaeng giceh hix mbouj wenjda saekdi, yawj couh rox gyaqci hai ndaej gig menh. Gij mok cimq dumz le seiqhenz sojmiz. Byoemcienj najbyak gou dumz ndaej giet baenz geu liux, gwnz bwndaraemx hix nem hwnj le haujlai raemx mok. Gou byaij moix yamq loh cungj gig siujsim, lau cungj geizheih neix gig vaiq couh mbouj miz lo.

Mwh nditciuq henjgim daj byai mbwn yied hwnj yied sang, gij mok hix menhmenh baez di baez di siu bae lo, seiqhenz sojmiz youh yienh ok le yiengh gaeuq, seizneix cij fatyienh madaengz yienhsaed lo. Cungj roxnyinh geizheih、moengzloengz haenx cijmiz caj daengz baezlaeng miz mok seiz cij ra ndaej dauqma lo.

(bouxsij: Huz Vwnzcingh;bouxhoiz: Ouh Caijfangh)