Dahsau Seizcin gwih duj fwjhau daeuj gizneix ciuqseiz guh hong! Hoeng mwh de yawjraen seiqgyaiq mokfoenfoen, miz di hozndat lo.

Mbwnheu caeuq fwjhau cungj deng caengz mokfaenx nanoeknoek dangj dwk, Dahsau Seizcin cadi hozndat ndaej ngunh bae. De ci rumz hung, naemj ci mokfaenx bae, hoeng rumz baez daengx mokfaenx youh dauq lo. De doek le fwn hung, dauqdaej hoenx ndaejhingz mokfaenx, loh’ok le fwjhau caeuq nditndat.

Dahsau Seizcin rox le vunz luenh gveng nyapnyaj, vihneix de ci rumz hung dawz daehsuliu ci haeuj naj vunz bae, lumjnaeuz cingq naeuz:“Yawj gij saehndei gyoengqsou guh!” Bouxguhhong vanzbauj hai hong lo, dawz nyapnyaj baet seuq le, doeklaeng Dahsau Seizcin youh ci rumz hung, dawz gij daehsuliu youq gwnz faex haenx ci roengzdaeuj gyau hawj bouxguhhong vanzbauj.

Dahsau Seizcin miz di baeg, hoeng mwh de yawjraen nyefaex saeknamh caeuq diegdeih ndongqndangndang, youh hozndat lo. De iet fwngz okdaeuj yungh rengz ngauz gova caeuq nyefaex, lij hemqheuh:“Vaiq hwnqmbonq ya, seizcin daeuj lo!” Gova deng heuh singj lo, gyoengqde vuenh hwnj buhvaq ndingnding heuheu, angqyangz ok dou lo. Nye goliux hix deng heuh singj lo, gyoengqde daenj hwnj le buhmoq saekheu, cung ok dou ranz bae.

Mbwn bienq heu lo, deih bienq seuq lo, dahraemx yungz lo, va nywj okdaeuj guhcaemz lo, Dahsau Seizcin angqyangz naeuz:“Seizcin daeuj lo!”

(Ngeih nienzgaep Yangz Gaijcez raiz Dahdingz hoiz)