Gyaeundei, gizgiz cungj miz. Miz vunz gangj, funghgingj gyaeundei dwg gij gyaeundei caencingq, lij miz vunz gangj, gij yienghsiengq vunz gyaeundei cij dwg gij gyaeundei caencingq, gou nyinhnaeuz gij sim vunz gyaeundei cij dwg gij gyaeundei caencingq.

Miz baez ndeu, gou caeuq daxmeh yaek naengh cigoenggyau okbae liuh, dou ndwn youq baihnaj gaiq baiz aencamh caj le geijcib faen cung ci cij daeuj daengz, gou caeuq daxmeh hwnj ci le, yawjyawj seiqhenz, aen dieg- naengh ndeu cungj mbouj miz, ndaw ci ndaetfwdfwd, youq ndaw ci gou couh lumj duz moed ra diegbae ndeu, baenzlawz caenx hix caenx gvaqbae mbouj ndaej, gvaq yaep he, miz geij boux vunz roengz ci, ndaw ci mbouj ndaet geijlai lo, hoeng lij dwg mbouj miz saek aen diegnaengh, aen ga gou cungj ndwn unq liux lo, daxmeh doiq gou naeuz:“Genhciz geij faen cung dem couh daengz lo.” Gou naeuz:“W.”

Seizneix, miz dah cej mbouj hung gvaq gou geijlai bi ndeu sawqmwh ndwn hwnjdaeuj, naeuz:“Dahnuengx, mwngz naengh gizneix ba.” Gou naeuz:“Mbouj yungh lo, dou yaek daengz lo, mwngz naengh ba.” Dah cej iq haenx naeuz:“Mwngz naengh ba, gou raen mwngz ndwn youq haujlai nanz lo, haengjdingh naet lo.” Yienghneix, gou doiq dah cej haenx gangj le sing gyo’mbaiq, couh gvaqbae naengh yaep he. Gou caeuq daxmeh naengh le yaep he couh roengz ci lo, roengz ci le, gou itcig lumz mbouj ndaej dah cej nyiengh diegnaengh hawj dou haenx, yienghsiengq de mbouj dwg gig gyaeundei, hoeng sim de cix gyaeundei dangqmaz.

Daj gienh saeh neix, gou rox lo, vunz mbouj itdingh aeu maj ndaej gyaeundei cij dwg gij gyaeundei caencingq, aeu sim gyaeundei cij dwg gij gyaeundei caencingq.

(Sam nienzgaep Ningz Mungz raiz Dahdingz hoiz)