“Mwngz miz ndaundeiq lai baenzneix miz gijmaz yungh ne?”

“Miz ndaundeiq cix baenzsaq baenzmiz lovei!”

“Baenzsaq baenzmiz youh miz gijmaz yungh ne?”

“Langhnaeuz miz vunz raen ndaundeiq moq, gou cix cawx ndaej lailai ndaundeiq dem vei!”

ndawcaw gag ngeix naeuz: “Boux vunz neix naemj lumj boux laeujgeq de dahraix!”

De youh cam naeuz:“Mwngz guhlawz hah ndaej doenghgij ndau- ndeiq neix ne?”

“Nyaenx mwngz naeuz vei, ndaundeiq mbouj dwg duh gou, dwg duh bouxlawz ne?” Boux guh gaicawx neix hozndat dauqcam Lwgvuengziq naeuz.

“Gou mbouj rox ne. Mbouj rox ndaundeiq dwg duh bouxlawz ne.”

“Nyaenx ndaundeiq cix dwg duh gou lo, aenvih gou dwg boux daih’it naemj daengz hahmiz ndaundeiq.”

“O, baenz yienghneix ha?”

“Dwg vei! Langhnaeuz mwngz raen naed cuenqsig ndeu mbouj dwg duh bouxlawz, yienghneix de cix dwg duh mwngz lovei! Langhnaeuz mwngz raen aen ndonj ndeu mbouj dwg duh bouxlawz, yienghneix de cix dwg duh mwngz lovei! Couhdwg gangj, langhnaeuz mwngz naemj daengz gij doxgaiq fwx naemj mbouj daengz de, gij doxgaiq neix couhdwg duh mwngz lo! Ndigah, ndaundeiq dwg duh gou, aenvih gaxgonq mbouj miz saek bouxlawz yaek hah miz gyoengq- de.”

“O, gangj ndaej deng bw!” Lwgvuengziq naeuz,“Hoeng mwngz aeu gyoengqde daeuj guh gijmaz ne?”

“Gou guenjleix doenghgij ndau- ndeiq neix. Gou suenq gyoengqde miz geijlai aen baez liux baez moq. Gaiq saeh neix hoj guh lai bw! Hoeng gou raen goj mizyinx raixcaix bw!”

Boux guh gaicawx neix guh yienghneix han Lwgvuengziq, Lwg- vuengziq mbouj habhoz geijlai nauq, naeuz dem:

“Langhnaeuz gou miz diuz gaendukhoz seicouz ndeu,” de naeuz, “Gou cix duk gwnz hoz dawz deuz bae. Langhnaeuz gou miz duj va ndeu, gou cix mbit dujva aeu deuz bae. Hoeng mwngz mbit aeu ndaundeiq mbouj ndaej ne!”

“Gou mbit aeu ndaundeiq mbouj ndaej, hoeng gou aeu gyoengqde rom haeuj ndaw ngaenzhangz ndaej bw.”

“Guhlawz gangj ne?”

“Couhdwg gangj, gou aeu soq ndaundeiq raiz youq gwnz sa, liux cix aeu mbaw sa coq haeuj ndaw habyot bae daep de hwnjdaeuj.”

“Yienghneix cix baenz la?”

“W! Yienghneix cix baenz lo!” Boux guh gaicawx neix han naeuz.

“Mizyinx dahraix bw!” Lwg- vuengziq ngeix naeuz,“Mizyinx lumj raiz hotsei liux bw, hoeng mbouj cingqheiq geijlai ne!”

Guhlawz cingq dwg cingqheiq, youq ndaw saida Lwgvuengziq saeh cingqheiq caeuq gij bouxlaux de mbouj doxlumj saekdi bw. De laebdaeb naeuz dem:

“Gou miz duj va he, gou ngoenzngoenz rwed raemx hawj de. Gou lij miz sam goengq ndoifeiz, hophop cungj baet baez ndeu. Ndoifeizdai gou goj caemh baet dem. Bouxlawz cungj mbouj rox de seizlawz dek. Gou miz ndoifeiz caeuq dujva, gyoengqde doiq gou daeuj gangj miz yungh. Hoeng, ndaundeiq doiq mwngz mbouj miz yungh saekdi ne……”

Boux guh gaicawx neix bak ngoemxngwt mbouj miz vah gangj lo. Yienghneix Lwgvuengziq cix deuz lo.

Lwgvuengziq goj byaij goj byaij, vubvub vebveb gag naeuz: “Bouxlaux geizheih dahraix!”

(17)