Seizcin daengz lo, ndaw ndoengfaex miz duz roegga iq ndeu caeuq daxmeh de youq. Ngoenz neix, daxmeh duz roegga iq baenzbingh lo, duz roegga iq gietdingh bae ra non ma hawj daxmeh gwn, baenzneix gij bingh daxmeh couh ndei vaiqdi lo.

Duz roegga iq mbin ha mbin ha, sawqmwh bungz gyoengq doengzdoih, gyoengqde iucingj de doxcaez guhcaemz, hoeng duz roegga iq siengj daengz: Gou wnggai caeuq gyoengq doengzdoih doxcaez guhcaemz roxnaeuz bae ra non ma hawj daxmeh gwn ne? Seizneix de ukgyaeuj baez doengh, sim siengj: Mbouj ndaej, daxmeh lij baenzbingh youq ndaw ranz, gou itdingh aeu bae ra doxgaiq daeuj hawj daxmeh gwn. Ndigah de youh laebdaeb mbin bae baihnaj, de sijsaeq dwk ra ha ra ha, dauqdaej ra raen duz non youh biz youh hung ndeu lo. De sim’angq dwk gaeb aeu duznon riengjvaiq mbin bae ranz.

Dauqma daengz ranz le, duz roegga iq aeu duznon youh biz youh hung neix bwnq hawj daxmeh gwn, daxmeh gamjdoengh dwk fwt gotdawz duz roegga iq cup geij mbat, lij sim’angq sim’onj dwk doiq de naeuz: “Baujboiq, mwngz dauqdaej rox ciuqgoq daxmeh lo, mwngz caen dwg lwgndei daxmeh!”

Doenggvaq aen goj neix, gou rox gyaez dwg song mbiengj dox baedauq lo, gou lij aeu hag duz roegga iq dem, bang daxboh daxmeh guh gij saehcingz bonjfaenh guh ndaej daengz haenx.

(sam nienzgaep Goz Cenzhih raiz Dahdingz hoiz)