“Mwngz ndei!” naeuz, “Aenmauh mwngz geizheiq raixcaix.”

“Daenj aen mauh neix dongx vunz lai roxsoq roxlaex go.” Boux- luemjrog neix han naeuz, “Miz vunz dongx gou, gou cix duet mauh yaengx sang gyo’mbaiq gyoengqde. Hoeng mbouj miz saek boux vunz byaij gvaq gizneix ne, doeknaiq lai lo.”

“Baenz yienghneix ha?” Lwg- vuengziq naeuz. De nyi mbouj rox bouxluemjrog neix gangj gijmaz.

“Bongxfwngz vei! Aeu fwngzgvaz bongx fwngzswix.”

Lwgvuengziq nyi liux cix bongxfwngz. Bouxluemjrog neix cix yaengx aenmauh gyo’mbaiq Lwg- vuengziq.

Lwgvuengziq gag ngeix naeuz: “Mizyinx gvaq guekvuengz bw!” De cix bongxfwngz dem. Bouxluemjrog neix cix yaengx aenmauh gyo’mbaiq de dem.

Lwgvuengziq baenz yienghneix guh le haj faen cung, liux cix miz di mbwq le, cam naeuz:

“Gou guhlawz guh mwngz cij cuengq aenmauh roengzdaeuj ne?”

Bouxluemjrog nyi mbouj haeuj coenzhauq de. Aenvih bouxluemjrog dingqnyi gag coenzhaenh coenzndei ndwi.

De cam Lwgvuengziq naeuz: “Mwngz coengzbaiq gou dahraix dwg le?”

“Coengzbaiq dwg eiqsei gijmaz ne?”

“Coengzbaiq couhdwg mwngz nyinhnaeuz gou youq gwnz aen singgiuz neix, vunz ceiq mbauqndei, daenj buhvaq ceiq gyaeundei, ndaw ranz ceiq baenzsaq baenzmiz, uk ceiq gvai ceiq lingz.”

“W, aen singgiuz neix miz gag mwngz boux vunz dog ndwi bw.”

“Gyaemj gou mbat ndeu ndaej lwi? Mwngz coengzbaiq gou mbat ndeu vei!”

“Gou coengzbaiq mwngz!” Lwg- vuengziq yoenjyoenj mbaq, naeuz,“Yienghneix mizyinx lai ma?”

Gangj liux Lwgvuengziq cix deuz lo.

De vubvub vebveb gag naeuz: “Bouxlaux geizheih dahraix!”

Cibngeih

Lwgvuengziq byaij baenaj dem, byaij daengz aen singgiuz daihsam, gwnz neix miz boux laeujgeq ndeu. Lwgvuengziq daeuj cunz gwnz neix mbouj nanz geijlai, hoeng Lwg- vuengziq youq gwnz neix nyupnyuk lailai.

“Mwngz guhmaz ne?” De cam laeujgeq naeuz, boux laeujgeq neix youq baihde naengh ndwi, mbouj gangj saek coenz hauq, dangqnaj de miz dong bingzlaeuj he, ndaw bingz mbangj coux miz laeuj, mbangj mbouj miz.

“Gwn laeuj go!” Laeujgeq naj- saep han naeuz.

“Mwngz vihmaz gwn laeuj ne?” Lwgvuengziq cam naeuz.

“Gou yaek lumz.” Laeujgeq han naeuz.

“Lumz gijmaz ne?” Lwgvuengziq cam dem, de cojgvaq boux laeujgeq neix.

“Lumz najmong go.” Laeujgeq doekdin naiqhengh nyinhsoh han naeuz.

“Najmong gijmaz ne?” Lwg- vuengziq cam de dem, de naemj coengh boux laeujgeq neix.

“Najmong gwn laeuj go.” Laeuj- geq gangj coenz neix sat cix mbouj guhsing lo.

Lwgvuengziq naemj mbouj rox boux laeujgeq neix guhmaz le.

De laebdaeb byaij baenaj dem, vubvub vebveb gag naeuz: “Bouxlaux geizheih dahraix!”(15)