Youq rog singz aen singz iq ndeu, miz aen ranzfaex daegbied ndeu, ndawde miz boux vunzgeq gadog ndeu youq, de miz suen va ndeu. Vunzlai moix ngoenz cungj raen de youq ndaw suen nyaengqfoed, de daet nga mbaw、rwed raemx dwk bwnh, suenva hawj de loengh ndaej gyaeundei dangqmaz, daengx bi daj gyaeuj daengz byai, roeg heuh va hom, duzrwi mbin duzmbaj foux.

Miz bi ndeu, canghdajveh ndeu loh gvaq gizneix, de yawjraen suenva caeuq aen ranzfaex gyaeundei neix, sim maij dangqmaz. Seizneix, de yawjraen boux vunzgeq haenx, hawj de doek- saetyat dwg, boux vunzgeq haenx dwg boux dafangz ndeu. De byaij haeuj henz ndang boux vunzgeq neix, ngeiz- vaeg dwk cam:“Mwngz yawj mbouj raen gij va gyaeundei neix, hoeng cix moix ngoenz cungj mbouj rox naetnaiq dwk youq ndaw suenva nyaengqfoed, vih gijmaz?” Boux vunzgeq riu lo, naeuz: “Daih’it, seiz gou lij coz dwg boux- ganqva, ndigah ciuhvunz neix cungj dwg bouxganqva; daihngeih, aen da gou yawj mbouj raen, hoeng gou lij miz fwngz, ndaej lumh raen gij va gou; daihsam, gou youq ndaw suenva youq, baenzngoenz nyouq daengz gij hom dujva; aen yienzaen ceiq doeklaeng, cix dwg aenvih mwngz.”

“Gou? Hoeng, mwngz youh mbouj roxnaj gou ha!”

Boux vunzgeq laebdaeb naeuz: “Dwg ha, gou mbouj roxnaj mwngz, hoeng gou rox dujva dwg dahsien ndawbiengz, vunzvunz cungj roxnaj dujva, cungj mbouj doi gij iucingj dujva. Miz haujlai boux ndiepgyaez ndwenngoenz lumj mwngz yienghneix ginggvaq gizneix, cungj aenvih yawjraen suenva gyaeundei neix daengx din roengzdaeuj, vih de sim sangj. Gou hix miz seizgei caeuq mwngz youq gizneix gangjgoj, doxcaez faenyiengj gij angq- yangz dujva.”

Cijaeu ndaem va roengz ndaw sim bae, couh itdingh yawj ndaej raen gij gyaeundei va hai, nyouq daengz gij hom va hai, dingqnyi gij sing va hai.

(sam nienzgaep Sez Mungz raiz Dahdingz hoiz)