Duzdouq iq byaij ok douranz, daeuj- daengz ndaw ndoeng guhcaemz. De byaij ha byaij ha, sawqmwh doek fwn hung hwnjdaeuj, duzdouq iq guhmuengz ra le duj raet hunghung he dangguh aen liengj gang hwnjdaeuj.

Duzdouq iq gang aen liengj dauqranz, youq gwnz roen bungz daengz duzrwi iq、duz- mbungqmbaj iq caeuq duzmoed iq. Gyoengqde caez doengzsing naeuz:“Duzdouq iq simndei, mwngz ciq aen liengj raet hawj dou ndojndoj fwn ndaej lwi?” Duzdouq iq naemj, gyoengqde baenzneix iq, rwed fwn hung baenzneix haengjdingh miz yungyiemj.“Haeujdaeuj ha! Gyoengqsou youq gizneix ndoj fwn ndaej!”Duzdouq iq yiedcingz daih gyoengqde, caemhcaiq aeu dingzlai aen liengj nyiengh hawj gyoengqde, bonjfaenh cix deng fwn rwed lo. “Gyo’mbaiq mwngz, duzdouq iq!”

Dauq daengz ranz seiz, fwn ngamqngamq dingz, duzdouq iq doq saenzdedded doq haetcwi. De aeu buhvaq deng rwed dumzdwddwd haenx duet roengzdaeuj, vuenh hwnj buhvaq hawq.

Daengngoenz daxgoeng youq ndaw fwj yawjraen le doenghgij neix, couh daj ndaw fwj okdaeuj, coh duzdouq iq yaengx lwgfwngzmeh naeuz:“Mwngz caen dwg duzdouq iq simndei gyaez bang vunz ndeu, gou daeuj bang mwngz dawz buhvaq dak hawq ba!”“Gyo’mbaiq mwngz haenhndei, neix dwg gou wnggai guh!” Duzdouq iq angqyangz naeuz.

(bouxraiz Vuz Cinyenz bouxhoiz Dahdingz)