Guekvuengz nyinhnaeuz boux- boux vunz cungj deng aeueiq de, de mbouj hawj saek boux vunz fanjdingj de. De dwg boux guekvuengz dogcaiz cienceiq ndeu, hoeng goj dwg boux vunzndei ndeu, de roengz minghlingh cungj habcingz hableix.

De ciengzseiz naeuz:“Dangh- naeuz gou minghlingh boux ciengh- ginh ndeu bienqbaenz duz roeghaij ndeu, cienggun mbouj fugcoengz nauq, nyaenx, cix mbouj dwg de loek nauq, dwg gou loek bae go.”

“Hoiq naengh roengzdaeuj ndaej lwi?”Lwgvuengziq mbeinou dwk naeuz.

“Gou minghlingh mwngz naengh roengzdaeuj.” Guekvuengz han naeuz, liux cix vifung dwk doenqdoenq geu buhbauzraez de. Hoeng cix ngeix naeuz:“Aen singgiuz neix iq baenzneix, boux guekvuengz neix guenj gijmaz ne?”

Lwgvuengziq doiq guekvuengz naeuz:“Guekvuengz ha, hoiq cam caeuj yiengh saeh he ndaej lwi?”

Guekvuengz cix haen sing naeuz:“Gou minghlingh mwngz cam.”

“Guekvuengz ha, caeuj guenj gijmaz ne?”

“Gijmaz cungj guenj liuxliux bae!”Guekvuengz ndaenggon han naeuz.

“Guenj liuxliux bae?”

Guekvuengz fwngz vix coh sing- giuz bouxrei, singgiuz wnq caeuq ndaundeiq.

Lwgvuengziq naeuz:“Guenj doenghgij neix liuxliux bae ga?”

Guekvuengz han naeuz:“Wgo! Guenj doenghgij neix liuxliux bae bw!”

Laxlawz de mbouj gag dwg guekvuengz ndwi, de lij dwg bouxcawj daengx lajmbwn dem bw.

“Nyaenx ndaundeiq cungj fug- coengz caeuj ga?” Lwgvuengziq cam naeuz.

“Dwg vei!” Guekvuengz naeuz,“Gou heuh gyoengqde guh gijmaz gyoengqde coj deng guh gijmaz dahraix, mbouj gamj mbouj guh!”

Doenghgij gienzlig neix hawj Lwgvuengziq doeksaet dangqmaz. Langhnaeuz de miz gij gienzlig neix, de cix ngoenzngoenz ndaej yawj daengngoenz doekcongh mbouj gag seiqcib seiq baez ndwi, yaek yawj caetcib ngeih baez, bak baez roxnaeuz song bak baez cungj ndaej lo, goj mbouj hoj doenq daengqeij nauq. De nawh daengz de vit aen singgiuziq ndanggaeuq gag boux vunz ndeu ok rog daeuj, ndaw caw cix doeknaiq raixcaix, yienghneix de cix mbeifag ngaeuq naeuz:

“Hoiq yaek yawj daengngoenz doekcongh …… cingj caeuj coengh hoiq …… minghlingh daengngoenz doekcongh……”

“Caznaeuz gou minghlingh cienggun bienqbaenz duzmbaj youq ndaw byoz dujva mbin bae mbin dauq, roxnaeuz heuh de raiz heiqsiliengz, roxnaeuz heuh de bienqbaenz duz- roeghaij, hoeng boux cienggun neix mbouj yienghde guh nauq, mwngz naeuz dwg de loeng le roxnaeuz dwg gou loeng ne?”Guekvuengz cam naeuz.

“Dwg caeuj loeng go!”Lwg- vuengziq han naeuz.

“Wgo! Deng lo! Raeuz heuh fwx guh gijmaz wngdang hawj gyoengqde guh ndaej baenz.”Guekvuengz laeb- daeb naeuz dem, “Diuzgienh hableix vunzlai cingq fug. Caznaeuz mwngz minghlingh lwgminz bae giengh dah, yienghneix gyoengqde coj doxcomz hwnjdaeuj fanjdingj dahraix. Mingh- lingh gou habcingz hableix, gou miz gienzlig hawj fwx fugcoengz gou.”

“Yienghneix hoiq ndaej yawjraen daengngoenz doekcongh lwi?” Lwg- vuengziq gyoeksingj naeuz. Aenvih Lwgvuengziq gijmaz cungj yaek cam goek haemq rag.

“Ndaej go! Gou bae minghlingh daengngoenz doekcongh. Hoeng ciuq gij fuengsik gou guenj biengz de ne, gou deng caj daengz seiz habngamj gonq cingq ndaej roengz minghlingh.”

“Nyaenx caj daengz seizlawz ne?” Lwgvuengziq cam naeuz.

“W! W!” Mwh doekgonq guek- vuengz han, de bienj bonj sawlig nanupnup ndeu.“W! W! Caj daengz…… daengz…… haemhneix caet diemj seiqcib hauhneix, gou cix minghlingh daengngoenz doekcongh, daengz seizde mwngz cix ndaej raen daengngoenz doekcongh lo.”

（13）