Gou miz daegnuengx iq ndeu, bineix ngamq sam hop bi, de maj ndaej gyaeuj hung da raeh, bak de daegbied ngahgwn. Baez raen gou gwn doxgaiq, de cungj ngaeq gou aeu, danghnaeuz mbouj hawj de gwn, de couh daejngenge mbouj dingz. Gou caen naihhoz mbouj ndaej de, miz gij baenz gwn, cijndei deq de mbouj youq seiz roxnaeuz ndoj bae baihrog laeglemx gwn.

Ngoenz he banringz, gou cuengq- hag ma ranz, daegnuengx cingqngamj mbouj youq. Ye, caen dwg seizgei ndei lo! Gou lumj mbin nei buet haeuj ndaw rug gou, daj laj swiz mbon bau gyaujgwzliz ndeu——gijneix caen dwg gij saejdaeuz gou ceiq haengj gwn haenx lo. Gou naengh youq gwnz sahfaz, itmienh gwn itmienh yawj densi, cwxcaih dangqmaz!

Mbouj rox gvaq ndaej geijlai nanz, cij dingqnyi aendou yiengj “gvang- dang”, gou ngeux gyaeuj baez yawj, dwg daegnuengx ma ranz lo. De song da ronghmyigmyig, cimraurau gaiq gyauj- gwzliz ndaw fwngz gou. Mbouj baenz, vaiqdi yo saejdaeuz! Gou ganjgaenj dawz gyaujgwzliz yo haeuj baihlaeng bae, riengjret saet roengz sahfaz ma, lienz haiz cungj mbouj daenj couh buet haeuj rug bae. Daegnuengx lienzmuengz riengz haeujdaeuj, gou baez gven dou, yungh rengz daemx dwk, mbouj hawj de haeujdaeuj. Daegnuengx youq rog dou itmienh nyoengx, itmienh daejnganga hemq: “Dahcej, hai dou ha……dahcej, hawj gou gwn didi he……”

Gvaq yaep he, rog dou caem roengzdaeuj lo. Aiq dwg daegnuengx deuz luba? Gou laeglemx hai luengq dou he yawj baihrog, cij raen daegnuengx cingq naengh youq gwnz dieg bakdou, song da cimyawj aenrug, gwnz naj lij hoij miz raemxda……Aensim gou unq lo, nyoengx aendou, rex daegnuengx hwnjdaeuj, oet buenq bau gyaujgwzliz haeuj fwngz de bae…

Baez yo saejdaeuz neix gou youh saw lo. Ai! Byawz heuh gou dwg dahcej de ni?

(bouxraiz Cangh Yihdingz bouxhoiz Goenggen)