Yienghneix, duj va neix couh aeu cungj simcingz minjganj ngeizsim youh lau vunz yawj mbouj hwnj haenx daeuj nyoegnyamx Lwgvuengz- iq. Lumjbaenz, miz ngoenz he, de dwen daengz seiq diuz oen gwnz ndang de, doiq naeuz:

“Heuh duzguk daeuj vei! Gou mbouj lau!”

“Gizneix mbouj miz duzguk go, couhsuenq miz, duzguk goj mbouj gwn go’nywj go.”

“Gou mbouj dwg go’nywj.” Duj- va sing unq sing daemq naeuz.

“Doiq mbouj gvaq.”

“Gou mbouj lau duzguk go!” Dujva laebdaeb gangj dem, “Hoeng gou lau rumz, mwngz miz doudangq lwi?”

Lwgvuengziq gag ngeix naeuz: “Doenghgo lau rumz cix doeknaiq lai dwgrengz lai lo! Duj va neix hoj dajleix lai bw!”

“Gyanghaemh mwngz yaek hen- hoh ndei gou bw. Gizneix nitsisi. Gizneix youq mbouj onj youq mbouj soeng, giz gaxgonq gou youq……”

Coenzvah caengz gangj liux de couh mbouj gangj lo. De doek daengz gwnzbiengz seizde, lij dwg naed ceh ndeu. De mbouj raen gvaq biengz wnq. De raen gangjyaeuh deng vunz rox le najmong lai, couh daegdaengq ae song sam mbat, de yienghneix guh dwg siengj laih dwg Lwgvuengziq guh loek, de naeuz:

“Doudangq ne?”

“Gou seizneix couh bae aeu. Hoeng haxbaenh mwngz caeuq gou gangj……”

Dujva youh sing hung ae song sam mbat, lij dwg hawj Lwgvuengziq ienqhoij dwg bonjfaenh loek.

Yienznaeuz Lwgvuengziq ndiep duj va neix, hoeng seizneix goj mbouj saenq de lo. Coenz vah mbouj youqgaenj de Lwgvuengziq ciengzseiz dawzhaeujrwz, yienghneix couh ngoenzngoenz nyapsaebsaeb.

Miz ngoenz ndeu, Lwgvuengziq naeuz gou nyi:“Gou mbouj wnggai dingq gij vah dujva, baenzbaenz cungj mbouj wnggai dingq gij vah dujva, yawjyawj va, nyouqnyouq heiq va couh ndaej lo. Duj va neix hawj aen singhgiuz gou homfwtfwt, hoeng gou mbouj rox yiengjsouh gij homfwtfwt de. Dwen daengz duzguk, gou doengzcingz de cij deng, hoeng gou dauqfanj hozndat de……”

Lwgvuengziq lij naeuz gou nyi: “Seizde gou gijmaz cungj mbouj rox! Gou wnggai baengh de guh gijmaz daeuj yawj de, mbouj dwg baengh de gangj gijmaz daeuj yawj de. De gyaeundei lai, hom lai, hawj gou simsoeng angqfaengz, gou mbouj wnggai byag de okrog. Gou wnggai yawjbyoengq doenghgij bajheiq hawj vunz in’gyaez de, baihlaeng cix caencingq dwg unqswnh de. Dujva doxdoiqdingj lai, gangj caeuq guh mbouj doxlumj, hoeng seizde gou lij oiq lai, mbouj rox guhlawz gyaez de……”

Gouj

Gou naemj Lwgvuengziq dwg riengz duzroeg senjdieg deuz okdaeuj.

Gyanghaet ngoenz hwnjdin haenx, de beuj aen singhgiuz de caezcupcup bae, baet ndoifeizlix seuqsatsat bae. De miz song goengq ndoifeizlix, yienghneix rung haeuxhaet cix ngaih lai bw. De lij miz goengq ndoifeizdai ndeu dem, de hix dawz de baet ndaej seuqsatsat. De gag ngeix, gangj mbouj dingh de lij rox dauq lix moq! Baet seuq le, gyoengqde couh menhmenh miz gvilwd coemh dwk, yienghneix ndoifeiz couh mbouj sawqmwh bauqfat. Ndoifeiz bauqfat couh lumj feiz ndaw conghheuq yienghde ndwi.

Youq gwnz digiuz, vunz iq lai, baet ndoifeiz seuqsaw mbouj ndaej, yienghneix ndoifeiz hawj vunz deng nanh lai.

Lwgvuengziq lij beng geij go faexlwg faexceizlingz loeklaeng bae. De miz di siengsim. De laihnaeuz ngoenzlaeng mbouj dauq gizneix lo. Ngoenzde, gij hongranz neix sawj de gamjdaengz gig mbaeumbeng, de yaek guh ndeindei bae.（11）