Ranzmbanj gou youq Gvangjsih Hozciz Si, gizneix miz haujlai gijgwn ndei gwn. Faengx、haeuxnaengj hajsaek、ceiz daengjdaengj. Ndawde gijgwn gou ceiq haengj gwn dwg haeuxfaengx.

Haeuxfaengx miz aen raez、aen yenzcuihhingz caeuq aen samgak. Faengx dwg yungh mbawgofaiz roxnaeuz rongfaengx daeuj suek, caiq aeu fiengz cug ndei.

Vihmaz gou ceiq maij gwn faengx ne? Aenvih gij heiq haeuxfaengx cawj cug rangfwdfwd haenx, hawj vunz nyouq daengz le couh siengj gwn. Baezgonq gwn haeuxfaengx lij dwg bi’gvaq nguxnyied co’ngux ne. Geiq ndaej ngoenzhaenx haetromh, gou ngamq hwnqcongz, couh nyouq daengz haeuxfaengx rangfwdfwd lo, laxlawz dwg daxbuz cawj haeuxfaengx cug lo. Gou couh doq gaem aeu aen haeuxfaengx ndeu, dawz geu “buhrog” haeuxfaengx duet bae, gaemz hung gwnngoebngoeb. O! Caen dwg gijgwn gwnzbiengz ceiq feih ha! Gou laebdaeb gwn le geij aen, dungx cungj bengq liux lo. Daxbuz raen le couh naeuz: “Menh di gwn, youh mbouj vunz ciengj mwngz.”

Caen dwg ndei gwn ha! Moix baez daxbuz suek haeuxfaengx gou cungj gwn mbouj mbwq, caen maqmuengh nguxnyied co’ngux vaiqvaiq daeuj- daengz, aenvih nguxnyied co- ngux mbat daeuj- daengz, gou couh youh ndaej gwn daengz haeux- faengx daxbuz suek haenx lo.

（指导老师 莫秀成）