“Duznou deuz lo! Vaiq hwnqcongz gaeb nou!” Haetromh, gou lij ninz ndaej diemzsubsub, couh deng daxmeh hemq- yatyat cauz ndiu lo. Laxlawz dwg haemhlwenz gou gueng duz noucangh- suj sat le, lumz gven bakroengq, noucanghsuj couh swnh haemhlaep laeglemx ndonj okbae. Gig vaiq, dou daengx ranz gaenjgip dungyenz, riengjret doxcomz baenz aen “gaeb nou budui” ndeu.

Boux duicangj budui gaeb nou——daxheiz faensik naeuz: “Haemhlwenz ndaw ranz nit, lajcongz raeujrub, noucanghsuj haengjdingh dwg ndonj haeuj laj congz bae lo!” Gou boux fuduicangj neix doq roengz minghlingh “henz congz doxcomz”, dou seiq boux vunz baez “huha”, doq caenx daengz henz congz. Daxmeh guh boux bing’ex , baenqletlet dawz daeuj song aen dienhdoengz, cik haeuj laj congz bae, gokciengz cingqcaen gutgungq miz duz noucanghsuj ndeu. Hoeng, caj daihgya luenhfoedfoed, noucanghsuj baez “fit”, lumj raq rumzgeujgaeq nei ndonj haeuj laj daizsaw bae, baez yaepda couh mbouj raen ngaeuz, caen dwg swxbyaek daek raemx——hoengqvatvat.

“Nyengh gaeb” mbouj ndaej, dax- boh saeyez gietdingh yungh geiqmaeuz gaeb nou. De ndek gaiq bingj iq ndeu haeuj henz daiz bae, siengj yaeuh noucanghsuj okjdaeuj, hoeng nou- canghsuj di cungj mbouj hwnjdangq. Dou cij ndaejnyi noucanghsuj youq laj daiz fat ok gij sing bidbid bubbub, cix mbouj raen gij ngaeuz noucanghsuj. Gvaq yaep he, gij sing “bidbub” de mbouj ndaejnyi lo, daj laj daiz iet ok aen gyaeuj iqet dwggyaez ndeu, doeng muengh sae muengh, yawjraen daxboh youq henz hen, hwk dwk gipmuengz suk doxdauq. Gvaq yaep he, noucanghsuj demq daxboh mbouj haeujsim, couh laeglemx gamzdawz gaiq bingj haenx youh suk dauqbae. Ai, caen dwg aeu ceiz bae moeb ma, aeu bya dimz bakmeuz lo!

Geiq ndeu mbouj baenz, daxboh youh naemj geiq wnq, gietdingh “yaeuh gaeb”, youq gyaeuj diuz sienqco ndeu raix youzlwgraz, cuengq haeuj ndaw roengq bae, dawz lingh gyaeuj cug youq baihlaj bakroengq, guhbaenz aenhongx, yienzhaeuh cuengq aenroengq youq henz daiz. Noucanghsuj baez mbup raen homfwdfwd, deng geiq dahraix lo, cij raen song duz noulwg ceng gonq lau laeng ndonj haeuj aenroengq bae, coemj gwn gij saejhom haenx. Yaeuhgaeb ndaej dawz.

“Budui gaeb nou” ginggvaq cien- fanh sinhoj, doeklaeng haemzbaengz- laengz ndaej hingz.

(bouxraiz Lij Yenjyez bouxhoiz Goenggen)