Ngoenzlwenz banringz, gou youq gwnz roen ma ranz sawqmwh saekwk mbouj dingz, roxnyinh hoj youq raixcaix.

Gou lwnh hawj daxboh nyi, daxboh dingq le, sawqmwh najsaepsat naeuz: “Ciz Loz, mwngz dwg mbouj dwg youq mwh gaujsi cau gij dapanq bouxwnq deng lauxsae yawjraen lo?”

Gou baez ngawh, hozgaek naeuz: “Di cungj mbouj miz gij saeh neix!”

Daxboh dingq le, naeuz: “Gou dingq bouxwnq naeuz, mwngz deng lauxsae yawjraen lo.”

Gou gig ngeizvaeg，engq ndatheiq lo, aenvih daxboh ienuengj gou, gou roxnyinh gig utheiq, gou gejlwnh naeuz: “Aiq dwg bouxwnq deng yawjraen lo, gou caen dwg deng ienuengj ha.”

Hoeng, daxboh caenh naeuz gou yawj gij dapanq bouxwnq deng lauxsae yawjraen lo. Gou gikheiq raixcaix, ndaw da aeng rim raemxda, doeklaeng couh daejngenge.

Daengz mbatneix, daxboh riu naeuz: “Ciz Loz, seizneix lij saekwk dem lwi?”

Gou baez naemj, he, caen mbouj saekwk lo!

Daxboh cij naeuz: “Ciz Loz, haxbaenh gou caeuq mwngz gangj guhriu hane! Yungh gij fuengfap neix ndaej yw saekwk bw!”

Gou dingq le, bienq daej baenz riu!

Gij fuengfap daxboh son gou yw saekwk neix caen ndaej gik vunz, mwngz yaek haeujsim yungh bw! Gou roxyiuj, gij fuengfap yw saekwk lij miz haujlai cungj, lumj fanfoek mbaetheiq, gaemz iq ndoet raemxraeuj, nyaij mienhbauhawq doenghgij neix, baezlaeng mwngz hix ndaej bang bouxwnq yw saekwk lo!

(bouxraiz Ciz Loz bouxhoiz Yinj Fuzgen)