Roek

A! Lwgvuengziq, gou couh yienghneix rox le gij saedceij nyap- nyuk mwngz lo. Nanznanz doxdaeuj, mwngz dan miz cungj yinxdaeuz he couh dwg ngonzyawj gij gingjsaek vaiqhaemh daengngoenz doekcongh. Gyanghaet ngoenz daihseiq gou cij rox gij saeh neix. Seizde, mwngz doiq gou naeuz:

“Gou gyaez yawj daengngoenz doekcongh. Raeuz guhdoih bae yawj mbat ndeu vei!”

“Raeuz lij ndaej caj gonq go.” Gou han naeuz.

“Caj? Caj gijmaz ne?”

“Caj daengngoenz doekcongh go!”

Nyi liux mwngz raen geizheiq raixcaix. Doeklaeng mwngz cix riuhehe hwnjdaeuj. Mwngz doiq gou gangj: “Gou laihnaeuz gizneix dwg biengz dou ne!”

Cingqcaen, daihgya cungj rox, youq Meijgoz dwg banngaiz 12 diemj cung, youq Fapguek daengngoenz doekcongh lo. Danghnaeuz mwngz faen cung ndeu mbin bae daengz Fapguek, mwngz couh ndaej raen daengngoenz doekcongh lo. Hoeng Fapguek gyae’gyanggyang. Youq aen singhgiuz iqet mwngz, mwngz doenq aendaengq geij yamq couh ndaej lo. Yienghneix mwngz seizlawz siengj yawj daengngoenz doekcongh cungj ndaej……

“Miz ngoenz ndeu, gou yawj gvaq seiqcib sam baez daengngoenz doek- congh.”

Gvaq yaep he, mwngz youh naeuz:

“Mwngz rox ne……vunz nyap- nyuk youqmbwq seizde, cungj gyaez bae yawj daengngoenz doekcongh.”

“Ngoenz ndeu yawj daengngoenz doekcongh seiqcib sam baez, mwngz vihmaz nyapnyuk baenzlai ne?”

Lwgvuengziq mbouj guhsing.

Caet

Ngoenz daihhaj, lumj geij baez gonq ityiengh, baezneix youh dwg aenvih duzyiengz, gou ndaej rox gij baexmaed lwgvuengziq lo. Lumj dwg dinghdingh naemj haujlai nanz le, ndaej ok gijmaz gezgoj nei, de ndaemnduek cam gou naeuz:

“Danghnaeuz duzyiengz gwn faexcaz, de gwn mbouj gwn dujva ne?”

“Duzyiengz raen gijmaz couh gwn gijmaz go!”

“Dujva miz oen de goj gwn ha?”

“Miz oen de goj gwn go!”

“Yienghde oen miz gijmaz yungh ne?”

Gou mbouj rox guhlawz han de. Seizde gou nyaengq dwk baenq naed dinggyujsae gaz youq gwnz fazdunggih de okdaeuj. Gou nyapnyuk raixcaix, aenvih feihgih vaih ndaej gig youqgaenj, raemx gaenq mbouj doh gwn lo, gou youheiq lai lo.

“Yienghde oen miz gijmaz yungh ne?”

Lwgvuengziq cam gijmaz cungj gyaez cam goek cam rag. Aenvih naed dinggyujsae de hawj gou hozndat lai, gou naemj daengz gijmaz couh naeuz gijmaz: “Oen mbouj miz gijmaz yungh go. Va sawj oen bae coeg vunz ndwi!”

“O!”

Lwgvuengziq caem yaep ndeu, liux cix dacaengz hozbongz dwk doiq gou gangj:

“Gou mbouj saenq! Dujva unq- nemnem, dujva simndei lauxsaed, gyoengqde cungj siengj banhfap bauj bonjfaenh, laihnaeuz miz oen le vunzlai couh mbouj gamj daemj gyoengqde lo……” （8）