Ndwen 5 ngoenz 18 dwg ngoenz bozvuzgvanj gozci, Sanhgyangh Dungcuz Swciyen Dungzloz Myauzcuz Yangh cujciz cungh siujhagseng bae aen bozvuzgvanj Siuqdung Sanhgyangh, caeuq “mehdajsiuq” dangdieg hag daet ceij、dajsiuq、daemjrok daengj dinfwngz conzdungj, haeujgyawj roxnyinh gij vwnzva daemjrok guh reih guh naz Dungcuz.

Siuq dungcuz dwg gij dinfwngz comz daemj、nyumx、daet ceij、siuq youq itheij, cungjloih de fungfouq、yiengh moq、saek gyaeundei, gaenq youq bi 2011 liedhaeuj buek daihsam guekgya gaep feih vuzciz vwnzva yizcanj mingzloeg. Ndaw doz dwg geij boux hagseng cingq yawj hag dajsiuq.

(Vuz Lenyinh/吴练勋)