Byada’gyozsanh dwg Swhhih Yen gizdieg gingjsaek daih’it ndei. Gij gyaeundei Byada’gyozsanh dwg: Faex gyaeundei, rin geizheih.

Byaij haeuj bakdou Byada’gyozsanh, couh ndaej raen haujlai gocoengz geq bak bi haenx daengj ngaungau, miz mbangj mbawfaex heuyauyau, miz mbangj deng mwi bienq nding, ndawde miz go coengz geq ndeu, naengfaex lumj gyaeplungz nei raeuzrwd, cienznaeuz dwg Yivangz Dadi youzyawj Byada’gyozsanh seiz, byaij ndaej daengx ndang fathwngq, duet geu buhlungz venj youq gwnz gocoengz. Daj baezneix hwnj, go faexcoengz neix couh did ok gyaeplungz daeuj.

Gij rin Byada’gyozsanh gig mizyinx. Gij rinndaek Byada- gyozsanh yienghceij geizheih, miz mbangj lumj duzsaeceij doxrongx, miz mbangj lumj duzguk roengz bya, miz mbangj lumj duzgungjcoz mbe fwed, miz mbangj lumj duzyiuh gvaengx mbin gwnzmbwn, miz mbangj lumj duzgungqsou boemz youq henz daemz, caemhcaiq lij miz mbangj lumj daihvuengz cap youq gwnz bya langhda yawj seiqlengq……

Gij raemxmboq Byada’gyozsanh liengzseuseu diemzsubsub. Diuzrij gwnz bya ngutngeuj, raemxmboq menhmenh daj gwnz lae daengz laj, gij sing raemx lae “dingdoeng dingdoeng”, baez sang baez daemq, couh lumj gij sing aengimz ndei dingq raixcaix. Youq baihgvaz Byada’gyozsanh miz congh mboqcij ndeu, raemxmboq sawdikdik lumj Hangzcouh Lungzcingj, seizdoeng mbouj hawq, seizhah mbouj roenx. Dingqnyi naeuz gonqseiz miz gij raemxmboq hau lumj raemxcij haenx byoq okdaeuj gvaq, ndigah ndaej gij mingz heuhguh “mboqcij”. Miz fouq doiq ndeu haenh naeuz gvaq:“Ringaiq nyodcaz cungj naeuz feih bak, rij laeg raemxcij baez gwn diemzsub”.

Byada’gyozsanh caen dwg gyaeundei raixcaix! Gou gyaez Byada’gyozsanh.(bouxsij Ciz Gyah bouxhoiz Goenggen)