Haj

Moix ngoenz gou cungj rox di saeh gvendaengz aen singhgiuz Lwg- vuengziq, gij saeh de lizhai aen singhgiuz de caeuq baeyouz daengj. Doengh gijneix cungj dwg caeuq de doxgangj ndaej rox. Couh yienghneix, daengz ngoenz daihsam, gou ndaej rox gij boihseiz faexceizlingz lo.

Mbatneix, youh dwg aenvih saehcingz duzyiengz, Lwgvuengziq lumjbaenz gig yousim dwk cam gou:

“Duzyiengz gwn faexcaz, deng lwi?”

“ Dwg go, dwg caen go.”

“O! Yienghneix ndei lai lo!”

Gou mbouj rox duzyiengz gwn faexcaz vihmaz youqgaenj baenzlai, hoeng Lwgvuengziq youh naeuz:

“Yienghde, duzyiengz caemh gwn faexceizlingz lwi?”

Gou lwnh Lwgvuengziq naeuz:

“Faexceizlingz mbouj dwg faex- caz bw, de dwg gofaex hung lumj aen’gyaudangz, couhsuenq daiq gyoengq ciengh ndeu dauqma, goj gwn mbouj liux go faexceizlingz ndeu.”

Dwen daengz gyoengq ciengh, Lwgvuengziq cix riuhehe naeuz:

“Yienghde raeuz cix dawz gyoengq ciengh baenz duz baenz duz dab hwnjdaeuj.”

De youh lumj gig rox nei naeuz:

“Faexceizlingz caengz maj hung, hix goj daemqdetdet bw.”

“ Dwg go. Hoeng mwngz vih maz hawj duzyiengz bae gwn faexlwg faexceizlingz ne?

De han gou naeuz: “Ai! Gijneix lij yungh gangj ma?” De laihnaeuz mbouj gangj bouxboux cungj rox. Hoeng gou naemj gig nanz cij rox vihmaz.

Laixlawz, aen singhgiuz Lwg- vuengziq youq haenx, goj lumj aen singhgiuz wnq ityiengh, miz nywj ndei caeuq nywj rwix; yienghneix hix miz cehnywj ndei caeuq cehnywj rwix, hoeng cehnywj yawj mbouj raen bw. Gyoengqde ninz youq ndaw namh, saek ngoenz miz saek naed ceh siengj ndiu daeuj, yienghneix de ietnonx, najmong dwk didngaz coh daeng- ngoenz.

Danghnaeuz de dwg ngaz laux- baeg roxnaeuz ngaz meizgveiq, cix caih de majhung.

Hoeng, danghnaeuz dwg doengh- go rwix, hawj vunz rox couh doq deng ciemz bae.

Aenvih youq aen singhgiuz Lwgvuengziq, miz mbangj ceh gig dwglau, neix couh dwg ceh faex- ceizlingz. Ndaw namh daengx aen singhgiuz de gizgiz cungj miz doenghgij ceh neix. Danghnaeuz mwngz mbouj ciemz faexlwg de bae vaiq di, couh caiq hix mbouj miz banhfap cawz bae lo. Gyoengqde couh maj doh daengx aen singhgiuz, gij rag gyoengqde couh ndonj haeuj lajnamh ndonj byoengq aen singhgiuz. Dangh- naeuz aen singhgiuz neix iq lai, faexceizlingz youh lai, aen singhgiuz neix couh deng ragfaex ndonj dek ndonj byoengq bae.

“Youq biengz dou, gou deng guh ndei doenghgij neix bae,” Lwg- vuengziq naeuz gou nyi, “ngoenz- ngoenz gyanghaet, riengx bak swiq naj dajcang ndei le, couh deng bae baet aensinghgiuz seuqsaw bae. Aenvih faexlwg faexceizlingz caeuq faexlwg meizgveiq doxlumj, baez yawj ndaej ok go lawz dwg faexceizlingz, couh sikhaek ciemz de bae. Guh hong neix mbwq raixcaix, hoeng goj ngaih raixcaix.”（6）