Gou yienznaeuz dwg lwgsai coeng- mingz、dwggyaez ndeu. Hoeng, byawz liuh ndaej daengz, bi’gvaq ndwen- cieng, gou cuengq bauq seiz mbouj siujsim hawj aen da ndeu sieng vaih bae lo.

Daj neix hwnj, mboujlwnh gou siengj guh gijmaz, gyoengq lauxsae caeuq doengzhag cungj naeuz gou mbouj fuengbienh, mbouj hawj gou bae guh. Gij najsaek hojlienz gyoengqvunz, hawj gou saedcaih nanzsouh.

Haggeiz neix, ban dou daeuj boux lauxsae moq ndeu lo. Dangz go daih’it, lauxsae lij caengz byaij haeuj gyausiz, gou couh ngaem gyaeuj roengz, lau deng lauxsae moq raen naj gou. Hainduj hwnjdangz le, lauxsae moq heuh dou doxlwnz hwnj daiz bae gaisau bonjfaenh. Boux hwnj boux roengz, yaepda couh lwnz daengz gou lo. Gou lij dwg ngaem dwk gyaeuj mbouj ning, aenvih gou caen mbouj siengj hwnj daiz bae. Lauxsae moq ngamq daeuj dangyienz mbouj rox gij saeh gou, raen gou yienghneix, laihnaeuz gou mbei saeq mbouj gamj hwnj daiz, couh mbouj dingz gujli gou hwnjbae. Mwhneix, ndawsim gou caen dwg gijmaz feihdauh cungj miz ha. Gou mbouj dwg mbei saeq, hoeng gou lau lauxsae moq hix naeuz gou mbouj fuengbienh, mbouj yungh guh gaisau. Lauxsae moq lij youq gizhaenx caenh- rengz coi gou, gou nyaenx mbouj ndaej raemxda conh lo.

Sing bek fwngz ndeu, mbouj rox dwg byawz bek; benq sing bek fwngz riengz dwk yiengj hwnjdaeuj; doeklaeng dwg rangh sing bek fwngz lumj byajraez nei goksadsad. Gou ndwn hwnjdaeuj, lizhai aen diegnaengh, byaij bae coh gyangjdaiz. Gij sing bek fwngz hix mbouj dingz, itcig riengz gou byaij daengz gyangjdaiz. Gou nyaenx dwk raemxda, simcingz gig gikdoengh, baenz aen cih baenz aen cih gangj sat gaisau.

Sing bek fwngz ndeu, benq sing bek fwngz ndeu, rangh sing bek fwngz ndeu lumj byajraez nei, youh riengz dwk gou ma daengz diegnaengh, gou dauqdaej nyaenx mbouj ndaej lo, raemxda doek- yagyag, daej hwnjdaeuj lo.

Gou caen siengj doiq gyoengqvunz gangj, gou mbouj siengj sou hojlienz gou, mbouj siengj, mbouj siengj saek di, gou siengj sou vih gou bek fwngz, vih gou bek fwngz……

(bouxsij Siujmingz bouxhoiz Ouh Caijfangh)