Aen hagdangz dou dwg aen suenva hung gyaeundei ndeu. Dou moix ngoenz youq aen suenva neix hagsib, guhcaemz. Gou ceiq gyaez gij gingjsaek bakdou suenva.

Byaij haeuj suenva, baihswix dwg rangh heuraurau ndeu. Gwnz ranghheu miz go’nywj heuswdswd caeuq dujva iq mbouj rox mingz haenx. Haetromh, naed raemxcaw gwnz go’nywj deng ndit baez cik, lumj baenz naed baenz naed caw sawdikdik ndongqmyigmyig, gyaqciq raixcaix. Go’gyoij sangradrad haenx gaengq- gwdgwd daengj dwk, mbawgyoij raezrangrang, lumj mbawrwz Cuhbazgai nei, miz mbangj iet raez, miz mbangj buep doxroengz. Gwnz go’gyoij did ok aen gyoij iqetet, gou caen siengj mbaet aeu ma cimz mbat he. Gocuk gwnz dingjbo, lumj benq daihhaij heusoemsoem ndeu, saekseiz okyienh geij mbaw ronghenj, lumj dwg gij mbawfung ruzgangfung ndaw haij nei.

Baihgvaz dwg aen byabau ndeu, gwnz byabau miz go’nywj heuswdswd; miz vacaz cingq hai dwk hoengh- fwngfwng, hoengzmaeq fifi, lumj najriu dou ronghsagsag; lij miz gocoengz daengjgwdgwd, baenz bi seiq geiq cungj ngiengxgyaeuj sangvidvid. Gou ceiq boiqfug gocoengz lo, aenvih mboujlwnh rumz bongj nae at, de cungj baenz- haenx heusausau. Ndaw heusausau haenx goraeu lumj feizmbaw hoengzmyanmyan; gwnz faexsanhcah dawz miz baenz roix baenz roix mak iq saeknding, couh lumj naed cawhoengz gyaeundei nei yaekdoek sanxsanx. Gwnz byabau miz song aen dap iq, lumj song boux bingsoujsauq haenx, hensouj cindi.

Gou gyaez gingjsaek heusausau neix, gou ciengzseiz boux vunz dog youq gizneix ngaezngwd, loqsiengj, caemceh youq ndaw gingjsaek gyaeundei neix, simmaez youq ndaw haij saekloeg neix.

(bouxsij Yangz Sinh bouxhoiz Goenggen)