Mwh gou lij iq, dingq daxbuz gangj gvaq haujlai gojgaeq, ndawde gojgaeq ceiq hawj gou lumz mbouj ndaej dwg《Vunz Gaenx Reih Seng Bauj, Vunz Gik Reih Maj rum》. Daxbuz vih hawj gou rox gij yiyi ndawde, ciengzciengz gangj aen gojgaeq neix hawj gou dingq: Ciuhgonq, miz boux vunz ndeu, mbouj miz daxboh, couh caeuq daxmeh doxbaengh, hoeng de ngoenzngoenz bae guhdoj mbouj bae guhhong, reihnaz cungj fwz liux, lij yiemq haujlai caiq, caiqcawj ngoenzngoenz hwnj ranz coi caiq, de mbouj miz banhfap couh deuz bae ndoj, louz daxmeh youq ranz. Sawqmwh, miz ngoenz ndeu, de laeglemx ma ranz yawj, raen ranz moqsagsag, daxmeh lij daenj buhmoq dem. De gipmuengz buet hwnjbae cam daxmeh:“Daxmeh, mwngz baenzlawz miz buhmoq daenj? Ranz baenz- lawz lij bienq baenz ndei?” Daxmeh gangj: “Gou yungh gij gim daxboh mwngz louz roengzdaeuj haenx cawx buhmoq, coih ranz, gij caiq mwngz yiemq haenx gou hix bang mwngz boiz lo.”De gipmuengz cam: “Daxmeh, gim youq gizlawz?” Daxmeh gangj:“Youq ndaw naz.” De sikhaek buet bae coh ndaw naz, daengz ndaw naz, gijmaz cungj mbouj raen, de sing hung hemq: “Daxmeh, daxmeh, mbouj miz ya.” Daxmeh naeuz: “Youq laj namh, dawz namh vat hwnj couh raen lo.” Hoeng de dawz gaiqnaz cienzbouh vat liux lo lij mbouj raen saek naed gim. Daxmeh youh gangj:“Danghnaeuz doekceh, mbouj gvaq geijlai nanz couh raen daengz gim lo.” De ciuq daxmeh gangj bae guh, caemhcaiq lij ngoenzngoenz youq ndaw naz ciemz rum dwk bwnh, mbouj gvaq geijlai nanz, ndaw naz maj rim gohaeux henjrwgrwg. Seizde, daxmeh gangj:“Lwg ha, mwngz yawj, neix mbouj dwg gim ma?”De umj daxmeh naeuz: “Daxmeh, gou loek lo.”

Daxbuz gangj aen gojgaeq neix lwnh raeuz rox: Cijaeu gaenx guh, couh miz soundaej. Daj gou hwnjhag doegsaw daengz seizneix, gou couh dawz aen gojgaeq daxbuz gangj neix geiq youq ndawsim, hawj swhgeij daj iq couh miz sibgvenq ndei gaenx doegsaw gyaez guhhong, ndigah, gou ciengz bingz ndaej hwnj “hagsib biubingh” caeuq “youhsiu hagseng ganbu”.

Gou aeu aen gojgaeq daxbuz gangj neix yaenq youq ndawsim, hawj aen goj neix buenx gou majhung, buenx gou bae roengzrengz, bae buekguh, bae saedyienh siengjmuengh gou.

（指导老师：陆春梅）