bouxraiz Swng’aihgwzsuhbeilij bouxhoiz Luz Fwncangz

Mbatneix gou cix gvai lobw, gou daj gij vah de ndaej rox di saeh de daj gizlawz daeuj lo, yienghneix gou couh cam de naeuz:

“Mwngz daj singhgiuz wnq daeuj ha?”

Hoeng de mbouj han gou. De mienh yawj aen feihgih gou mienh ngaek gyaeuj, naeuz:

“O, mwngz naengh gaiq doxgaiq neix, daj giz gyae’gyae daeuj mbouj daengz gizneix.”

Gangj daengz neix de couh mbouj guhsing lo, gag ngeixloekloek faenhde. Doeklaeng de daj ndaw daehbuh aeu mbawveh duzyiengz okdaeuj, cim gij bauj de da mbouj yaep bae.

Gyoengqsou cungj naemj ndaej daengz, gou ndaej nyi coenzvah “singhgiuz wnq” neix, gou geijlai geizheih ha. Yienghneix gou couh naemj banhfap yaek rox lai di dem.

“Lwgvuengziq, mwngz daj giz- lawz daeuj ne? Ranz mwngz youq gizlawz ne? Mwngz naemj dawz duz- yiengz bae gizlawz ne?”

De ngeix yaep ndeu le han naeuz:

“Caeklaiq miz aen hab mwngz veh hawj gou neix, daengz gyang- haemh duzyiengz couh miz dieg ninz lo.”

“Dwg vei! Danghnaeuz mwngz dingqvah dem, gou lij veh diuz cag ndeu hawj mwngz, gyangngoenz mwngz ndaej lamh de hwnjdaeuj lo, veh gaiq dongh ndeu dem goj ndaej.”

dingq le mbouj angq lo.

“Lamh de hwnjdaeuj guh maz ne, geizheih lai lo!”

“Danghnaeuz mwngz mbouj lamh de, de couh luenh buet, couh ra mbouj raen lo.”

Lwgvuengziq youh riu ok sing naeuz:

“Mwngz naeuz de yaek deuz bae gyawz ne?”

“Bae gyawz cungj ndaej go, itcig buet baenaj……”

Seizneix Lwgvuengziq cix nyinh- caen naeuz:

“Mbouj ngaih, dieg gou iqet.”

Riengzlaeng, de miz di doeknaiq naeuz:

“Buet baenaj, goj buet mbouj bae geijlai gyae ne……”

Seiq

Yienghneix, gou youh rox yiengh saeh youqgaenj ndeu dem: Aen singhgiuz Lwgvuengziq youq haenx hung mbouj gvaq aenranz geijlai.

Gijneix mbouj hawj gou doeksaet geijlai, aenvih gou rox cawzok geij aen hingzsingh hung lumj digiuz, moeg- sing, gimsing, hojsing neix miz mingzcoh gvaq, lij miz baenz cien baenz fanh aen singhgiuz iq dem, miz mbangj iqetet, aeu gingqyawjgyae daeuj yawj cungj nanz yawj ndaej raen. Canghdienfaenz baez yawjraen aen ndeu, couh bien aen hauhsoq ndeu hawj de, lumjbaenz heuh de guh “hingzsingh iq 325”.

Gou miz baengzgawq youqgaenj nyinhnaeuz aen singhgiuz Lwg- vuengziq dwg aen hingzsingh iq B612. Aen hingzsingh iq neix youq bi 1909 deng boux canghdienfaenz Dujwjgiz aeu gingqyawjgyae yawjraen gvaq baez ndeu ndwi,

Dangseiz de youq baez daihhoih guekcaeq dienfaenzyozgyah daibyauj gwnzde, doiq gij fatyienh de guh le lwnhcingq gig youqgaenj. Hoeng, aenvih de daenj buh Dujwjgiz, mbouj miz saek boux vunz saenq de. Gyoengq vunzhung couh dwg yiengh- neix. （4）