Gou dwg ceh duhheu ndeu. Gou iqetet, heusausau, ndongjndadndad. Bouxcawj cuengq gou haeuj ndaw daeh bae, gou caeuq beixnuengx cejnuengx dinghsaebsaeb comz youq itheij……

Miz ngoenz ndeu, bouxcawj iq dawz gou caeuq beixnuengx cejnuengx cuengq haeuj aen mbonqraeuj coq rim raemx ndeu bae. Gou caeuq beixnuengx cejnuengx angqvauvau caenmaed youq itheij, ndaek gaemz ndoet raemx, ciemhciemh daj bouxbyombyam bienqbaenz bouxbizbwd.

Ngoenz daihngeih, aendungx luenzlulu gou dawz geu buhheu cengq sik lo, loh’ok naengdungx hausupsup. Gig vaiq geubuh loenq caez lo, dou cungj bienqbaenz hausupsup, lohlanglang, bizbwdbwd. Aeya! Gwnz ndang gou did ok diuz ga ndeu, iqetet, hausupsup, lij noengqnwdnwd ne. Gou ngonzngonz daxbeix daxcej henz ndang, gyoengqde hix did ga lo, miz mbangj lij beij gou lai miz diuz gen ndeu ne! Gou ndawhoz gag ngeix: Lauheiq gou ndaej maj lumj go faexloet daemx mbwn baenzneix hung. Yienghneix gou cengqrengz ndoet raemx, cengqrengz supsou gij yingzyangj ndaw ndit. Gaiq gen gou mbouj duenh did doxhwnj coh baihgwnz, gaiq ga gou laebdaeb iet raez coh baihlaj, gou maqmuengh ngoenzngoenz cungj miz bienqvaq moq.

Ngoenz daihseiq, gou ndiu gvaqdaeuj seiz, gou fatyienh swhgeij bienq ndaej sanghung, maenghcoek lo, caiqlix ndaej ndwn hwnjdaeuj lo! Mumjgyumq yawjraen song duz mbaj gyaeundei cup fajfwngz gou. Gou riunyumnyum coh duzmbaj, duzmbaj hix caenciet naeuz:“Angqcoux mwngz daeuj- daengz aen seiqgyaiq gyaeundei dwggyaez neix……” Seizneix, gou dingqnyi bouxcawj naeuz: “O! Ceh duhheu did mbaw lo.” Gou yawjraen bouxcawj foux din foux fwngz, haisim dangqma. Gou gag damzbywdbywd: “Laxlawz, gijneix dwg mbaw ha.” Gou yawj gij mbaw oiqoetoet lumj nyawhheu gou, nyignaj daengngoenz gyanghaet diuqfoux……Youh gvaq ngoenz ndeu, neix dwg ngoenz banhaet daengngoenz ronghndei ndeu, bouxcawj iq bok gij raemx ndaw mbonqraeuj bae, vuenh aeu raemxcingh, gou ndang soengswtswt hainduj bae ciep ngoenz moq. Diuzhwet gou engq soh lo, cungj miz haj roek lizmij sang lo. Gou gag ngeix: “Gou caen ndaej maj baenz go faexloet daemx mbwn lwi? Gou maqmuengh……”

Neix dwg aen seiqgyaiq saenzgeiz ndeu! Moix ngoenz gou cungj miz gij bienqvaq geizheih.

(bouxsij Cai Buzcwz bouxhoiz Goenggen)