Ngamq byaij daengz Dunghhuz Gunghyenz, doxbuenx rumzsaeq cififi, couh mup daengz gij heiq homfwdfwd go’nywj, riengzlaeng dwg gij nyod gwnz nyefaex ingj haeuj ndaw da daeuj, hawj gou roxnyinh daengz gij heiqsik seizcin lo.

Youq gwnz roen iq gunghyenz byaij, duzroeg caemh gou doengz byaij, gij faex henz loh hai rim dujva ronghmyigmyig, miz vayinghvah, miz vadauz. Vayingh- vah couh lumj baenz duj baenz duj giuznae venj youq gyaeuj nyefaex, vadauz cix lumj dahsau iq daenj vunj saekhoengzoiq nei youq gwnz faex diuqfoux, duzroeg youq nyefaex angqyangz saetdiuq, vih gyoengqde buenxciengq, daj giz gyae’gyae muengh bae, baenz daeb daenz daeb, lumj feizmbaw lumj fwjbya.

Caiq byaij bae coh baihndaw gunghyenz, couh yawjraen aen huz ndeu. Nditndat saj youq gwnz najhuz, langhraemx ronghmyigmyig, lumj gaiqnyawh heu- sumsum nei. Duzbya youq ndaw huz youz bae youz dauq, cwxcaih raixcaix, saekseiz ndonj gyaeuj okdaeuj youq najhuz byoq bop, roegbit youq ndawhuz guh’angq. Neix caen dwg “rogndoi godauz va hai raeuh, seizcin raemx raeuj bit sien rox”. Henz huz miz haujlai goliux, nyeliux youh saeq youh raez, riengz rumzcin binengneng, couh lumj baenz dah baenz dah lwgsau unqnemnem reuxredred.

Gou gyaez seizcin hoenghfwdfwd, heusubsub neix.

(bouxsij Vei Siujyinz bouxhoiz Goenggen)