bouxraiz Swng’aihgwzsuhbeilij bouxhoiz Luz Fwncangz

Ngeih

Gou couh yienghneix gadog gag youq, mbouj miz saek boux vunz doxgangj ndaej hab. Itcig daengz roek bi gonq, gou hai feihgih doek youq diegsa Sahhahlahsahmoz. Ndaw fazdunggih mbouj rox dwg gijmaz vaih lo. Seizde mbouj miz saek boux canghcoih, caemh mbouj miz saek boux vunz naengh feihgih, yienghneix gou couh sawq gag coih. Doiq gou daeuj gangj mbouj dai couh lix, aenvih gij raemx daiq daeuj haenx cij gaeuq gou gwn aen singhgiz ndeu.

Haemh daih’it, gou couh ninz youq diegsa hunggvangq fwzrikrik neix. Gou beij boux youq ndaw haij dengnanh fouz youq gwnz ruzfaex iq lij gagdog. Ngoenz daihngeih ranzrongh, yiengh sing geizheih ndeu heuh gou ndiu lo, gou doeksaet raixcaix. Yiengh sing de naeuz:

“Cingj mwngz veh duz yiengz ndeu hawj gou, ndaej lwi?”

“Guh maz ne?”

“Veh duz yiengz ndeu hawj gou……”

Gou doeksaet lumj deng byajraez gwnzmbwn bag deng nei, couh doq ndwn hwnjdaeuj. Gou yaepyaep da, yawj seiqhenz, yawjraen lwg vunziq daemqdetdet ndeu ndwn youq baihde, de goj yawj dwk gou. Mbaw veh baihlaj dwg mbawsiengq de gou gvaq- laeng veh hawj de mbaw ceiq ndei haenx. Hoeng de bonjvunz beij mbaw siengq neix baenzmbauq lai lo.

Veh mbouj ndei goj gaej gvaiq gou bw, aenvih gou ndaej roek bi bide, gyoengq bouxlaux cungj heuh gou gaej veh veh lo, cawzliux gaxgonq veh gvaq duznuem de, gou mbouj veh gvaq gijwnq.

Gou byaengq hung lwgda doek- saet dwk yawj lwg vunziq neix. Gyoengqsou goj gaej lumz bw, seizde gou youq gizdieg fwzrikrik de mbouj miz saek boux vunz. Hoeng lwg vunziq neix, yawj hwnjdaeuj goj mbouj lumj loengroen youq ndaw diegsa neix, goj mbouj raen naiq saek di, mbouj hozhawq saek di, mbouj lau saek di. Yawj yiengh de mbouj lumj boux lwgnyez loengroen youq ndaw diegsa fwzyauyau saek di. Gou couh cam de:

“Mwngz……mwngz youq gizneix guh maz ne?”

De mbouj vueng mbouj lau, youh dauq naeuz coenz vah neix:

“Cingj mwngz veh duz yiengz ndeu hawj gou, ndaej lwi?”

Gij doxgaiq saenzgeiz lai hawj mwngz doeksaet liux, mwngz mbouj gamj mbouj ei de guh, youq giz diegsa fwzyauyau neix, mbouj dai couh lix, yienznaeuz raen geizheih lai, gou goj lij aeu mbaw sa ndeu caeuq gonj bit ndeu okdaeuj. Seizde gou cix naemj daengz gou cij hag gvaq deihleix, lizsij, suenqsoq caeuq yijfaz, yiengh- neix gou couh miz di simnyap dwk naeuz hawj lwg vunziq neix nyi gou mbouj rox guh veh. De han naeuz:

“Mbouj youqgaenj! Cingj mwngz veh duz yiengz ndeu hawj gou ba.”

Gou mbouj veh duzyiengz gvaq, yienghneix gou couh veh duznuem gaxgonq veh gvaq haenx hawj de. Lwg neix yawj le cix han naeuz:

“Mbouj go! Mbouj go! Mbouj go! Gou mbouj aeu duznuem go, ndaw dungx de lij miz duzciengh dem.”

Gij vah de hawj gou moengh- mangh liux. De youh naeuz: “Duznuem dwglau lai, duzciengh youh ciemq dieg lai. Dieg gou youq haenx gig iq. Gou aeu duzyiengz couh ndaej lo. Veh duz yiengz ndeu hawj gou ba.”

（2）