“Dwg byawz gauj aenliengj gou vaih ha?” Dingqnyi laj laeuz miz vunz hemqnaeuz, gou couh gag doeksaet. Dai lo! Haengjdingh youh dwg aenliengj byawz dangj ndit daxbuz it laeuz lo.

Daxbuz it laeuz gaenq 70 lai bi lo, daegbied gyaez dak ndit, bingzseiz de cungj dwg hai conghcueng yangzdaiz hawj ndit ciuq haeuj ranz daeuj. Hoeng aen yangzdaiz de dep aen bungz- dingzci, baez daengz seizhah, cidienhdoengh dingz youq giz- haenx cungj foenfoen nda hwnj aenliengj dangj ndit, gij liengj neix dangj aencueng yangzdaiz daxbuz raemhrwdrwd. Daxbuz beizheiq gig gaenj, baez yawjraen aencueng yangzdaiz deng dangj, couh dawz faggimz daeuj geuh vaih aenliengj. Yienghneix, dax- buz gingciengz caeuq gyoengq vunz ranznden doxndaq, boux vuzyez guenjleix lai baez daeuj gienq hix mbouj miz yungh. Ne, youh miz liengj deng geuh vaih lo.

Gienh saeh neix gou yawj youq ndaw da geiq youq ndawsim, cungj siengj ra banhfap daeuj gaijgez. Ngoenzde, gou sawqmwh siengj ok aen banhfap ndeu, ma ranz sij mbaw ceij hung ndeu: “Cingj hawj ndit haeujdaeuj, dozcih boiqhab!” Yienzhaeuh nem mbaw ceij neix youq gwnz ciengz yangzdaiz daxbuz.

Aen singhgiz he gvaqbae lo, caen mbouj dingqnyi naeuz miz liengj deng geuh vaih dahraix lo. Gou yawjraen gyaq ci miz liengj haenx cungj gag liz aen yangzdaiz daxbuz gyae lo, gou guj gyoengqde itdingh dwg yawjraen mbaw ceij gou sij haenx luba.

Mbaw ceijdiuz gou sij haenx couh yienghneix ndaej gaijgez gij doxndaq haenx lo. Gou roxnyinh, gizsaed ndaw gwndaenj raeuz miz di doxdaemj, cijaeu daihgya doxnyiengh, couh itdingh ra daengz banhfap gaijgez.

(seiq nienzgaep Maj Gyahyi)