Mbouj rox vih maz, ranznden Auvangz caeuq mehsimj caeuxcaeux couh doxndaq hwnjdaeuj lo. Ne, daengz seizneix gwnngaiz lo, song boux de lij doxceng youq.

Mehsimj naeuz:“Mwngz gangj, song fanh maenz ngaenz mwngz dauqdaej yungh bae gizlawz la? Mwngz naeuz ngaenz lij cunz youq gyang mbawgaj sinyungse, hoeng vunz ngaenzhangz lwnh gou, gij ngaenz caeux couh deng lingx okbae lo. Mwngz lauxsaed gangj, gaej siengj myonx gvaqbae.”

“Raeuz mbouj dwg gya hwnq bungzranz yungh bae la.” Au sing iq dwk dap.

“Mbouj deng, aen haenx dwg aeu bet cien maenz gai byaek ndaej haenx daeuj hwnq, caeuq song fanh neix mbouj miz saek di gvanhaeh. Ngoenz- neix, mwngz caiq mbouj gangj vahsaed, gou couh mbouj caeuq mwngz gvaq lo.” Gij vah mehsimj gangj ndaej naek ha.

Dingq le coenz vah neix, Au- vangz, bingzseiz baez yaepda couh naemj ndaej geiq haenx, mbouj gamj caiq muenz vunz lo, de gangj: “Aen hagdangz siujyoz mbanj raeuz, mwngz hix rox ne, mbouj miz raemx mbouj miz dienh, daizdaengq gaenq vaih bae haujlai lo, aenranz hix nanz lai mbouj coih gvaq. Seizneix raeuz miz ngaenz le hix mbouj ndaej lumz caezgya bae ha, doiq mbouj? Gou couh bae lingx fanh haj maenz hawj Liuz yaucangj, hawj de yungh daeuj coihbouj hag- dangz.”

“Yienghneix lij miz haj cien ne?” Mehsimj youh bik cam naeuz.

“Bi’gvaq seizcou, Daegngeih ciengx duzgvi deng baenzbingh, de ngaiz siedbonj bae liux, raeuz caeuq de doengz mbanj, cungj dwg beix- nuengx, mbouj bang de sim mbouj onj ha, ndigah gou couh hawj de haj cien, hawj de caiq guh hwnjdaeuj.”

Gij vah boh’au hawj mehsimj hozroengz lo, de cienq huj baenz angq, aeu fwngz ceij dwk aen’gyaeuj Auvangz, gvaiq naeuz:“Mwngz ha, guh gijmaz saeh hix wnggai gangj coenz ndeu ha, gou dwg mehyah cunh ganbu, cungj saeh neix gou mbouj gojnaengz mbouj dapwngq ne, vih maz aeu muenz gou ne!”

Baez doxceng neix couh yiengh- neix dingz roengzdaeuj lo, gij saeh Auvangz nyienh vih vunzlai guhsaeh, haengj bangcoh vunz, mbouj doz hoizbauq neix hix youq ndaw mbanj cienz okbae lo.

(bouxsij Dingh Veij bouxhoiz Ouh Caijfangh)