●B2017,Yungzsuij Myauz- cuz Swciyen miz 6000 lai ranz dajndaem oij 7 fanh lai moux. Bi 2018 dok dangz doxdaeuj, Fungdangz Cizdonz Hozmuz Cin Dangzcangj aen yienh neix ngoenz bingzyaenz dok oij 5000 dun, ngoenz canjciz daih’iek 200 fanh maenz, daiqdoengh aen yienh neix 20000 lai boux bouxndaem’oij laisou baenz miz.

(Gungh Siengzyouj)

●Vih coicaenh gij canjnieb mak、nonsei hwngfat, ndwen 3 ngoenz 13, Cingsih Si Sinhcing Cin cujciz cin banhswj lingjdauj、ganbu venjdiemj、ganbu aen- mbanj(gai) caeuq ranz dajndaem lai haiguh yienhciengz son- gyauq dinfwngz. Doenggvaq son’gyauq, hawj gyoengq ganbu ndaej sonyinx mbanjvenjdiemj mizgven dinfwngz, gaijgez gij nanzdaez nungzhoh giepnoix dinfwngz.

(Vangz Sucinh)

●Mboengqneix, Denzdungh Yen Cwnghez haiguh “rumzcin soengq raeuj, gvansim gungzhoj caeuq cangqheiq” hozdung, cuj- ciz yihyoz veiswnghgai、gungh- sanghgai lai boux veijyenz daengz Yihih Cin、Nazbaz Cin daengj lai aen yanghcin soengq raeuj hawj mehmbwk gungzhoj. Gyoengq veijyenz haeuj ranz roxyiuj le gij cingzgvang gyaranz caeuq cangqheiq mehmbwk gungzhoj, yiengq gyoengq meh- mbwk senhconz gij ciengzsik yihyoz veiswngh, caeuq gyoengq- de caez doxyaeng gij banhfap vut gungz, caemhcaiq soengq cienz camnai caeuq doxgaiq bae hawj gyoengqde.

(Dingh Vazbungz)

●Ndwen 3 ngoenz 14 ban- ringzgvaq, 5 boux bouxguhhong Denzlinz Yen Gunghsanghgiz、Siuhveijvei byaij haeuj Denzlinz Yen Lozlij Daih’it Siujyoz haiguh aen hozdung henhoh gij gienzleih siuhfei haeuj ndawhag. Seiz hozdung, bouxguhhong yienhciengz baij gij sienghaih doxgaiq “sam mbouj miz”, doengzseiz leihyungh PPT vih hagseng gangjgej baenzlawz youq ngoenznaengz henhoh gij gienz- leih bonjfaenh, caemhcaiq yungh sibinz boqcuengq denjhingz anqlaeh, yiengq hagseng gangjgej gij ciengzsik henhoh gienzleih.

(Siz Cing)