Doengzhag ndaw ban daezok doxcaez bae “ranzfangz”. “Ranzfangz” dwg ranz gaeuq lauxsae, aenvih gij ranz neix gaeuq lai, gig noix miz vunz youq. Gou lau doengzhag riu gou mbeiiq, cijndei cengqgengz riengz gyoengqde bae yawj- yawj.

Dou youq naj “ranzfangz” gangjvah cijcij cetcet haemq nanz, cij miz boux doengzhag mbeihung ndeu byaij hwnjbae. De byaij ndaej gig vaiq, song sam mbat couh mbouj raen ngaeuz de youq baklae lo. Raen miz boux vunz he hwnjbae le, gyoengqvunz lumj mbouj lau dai nei, caenx hwnjbae lo.

Gou ndawsim gig luenh, dauqdaej hwnj mbouj hwnjbae ne? Gou nyaeuq dwk bwnda, siujsim dwk yamq bae coh aenlae yamq he. Sawqmwh, din gou lumj deng feiz ndat nei, youh sou din dauqma. Gou youh gag gujli swhgeij, laep da hwnj, vaiqvet dwk byaij hwnj lae bae geij yamq, raen mbouj miz iucing fangzyak, seiq- henz lij dwg yienghhaenx caemdingh. Yienghneix gou youh cengqgengz yamq bae geij yamq. Seiqhenz caemrwgrwg, caem dwk gou dingq ndaejnyi sim gou diuqbubbub. Moix yamq yamq he cungj dwg gig coegcamz, genhciz byaij le haujlai yamq, gou dauqdaej byaij hwnj ngeih laeuz lo. Gou byaengq lwgda, yawj aen “ranzfangz”, raen aenranz neix cij mbouj- gvaq dwg aen ranz gaeuq he. Gou mbeihung buet hwnj caengz laeuz ceiqsang aen “ranzfangz” neix bae.

Gou lumj roxdaengz lo: Gij lae aen laeuz neix couh lumj mbaeklae ciuhvunz, moix mbeihung yamq hwnj bae mbaek ndeu, couh liz cwngzgungh gyawj di ndeu.

(sam nienzgaep Cuh Yizveij)