Ndang goeng gou mbouj sang, de enj dwk aendungx hung ndeu, lumj youq najaek umj dwk aen sihgvah nei.

Gou gig baiqfug goeng gou, aenvih de dang bing gvaq, caemhcaiq lij dwg boux dangjyenz geq ndeu ne. Moix baez bungz daengz cuengqgyaj, gou couh nem dwk daxgoeng heuh de gangj gij saeh yinx mwh gyoengqde dangbing haenx, lij miz guekcoj hungmbwk raeuz fatseng le gijmaz bienqvaq lai. Goeng ne, couh umj dwk gou gangj mbouj dingz, dou gig doxcaen ha.

Daxgoeng dwg boux“roenroen doeng”ndeu——de sugrox gij roen doeng bae seiqmienh betbaih haenx, caemhcaiq ndaej gig cinj ceij ok, yienzhaeuh genjdanh cingcuj gangj hawj vunz diegrog nyi, de caen yiedcingz、miz sim ha. Vunz diegrog dingq le sikhaek couh roxdingh lo, youq henz deihdeih ngaek gyaeuj. Moix baez de ceij roen hawj vunz seiz, gou youq henz ndang de hix roxnyinh miznaj lai, nyaenx mbouj ndaej youq ndawsim haenh de, doengzseiz gou hix daj ndawde hag ndaej haujlai dilij cihsiz.

Goeng gou lij gyaez yawj bauq- ceij dangqmaz, daj ndaw bauqceij “daezlienh”ok gij neiyungz ndei daeuj. Mwh gou banringzgvaq ma ranz baez haeuj dou, de couh hainduj dawz gijneix lwnh gou nyi, doengxhaemh gwn caeuz seiz de youh caeuq daxmeh lwnh ndaej haenqremrem.

Goeng gou lij gyaez bae youz. De moix baez cungj maij riengz gyoengq- vunz seiqlengq bae youz, gou swhyienz hix miz faenh, ciengzseiz ndaej riengz de bae. Youq geij bi neix gou ndaej bae le haujlai deihfueng, hix hag ndaej haujlai cihsiz, caen maqmuengh gij gihvei neix caiq miz lai di.

Goeng gou lij rox dajcawj, de cawj gij byaek homvan habbak, bouxboux cungj gyaez gwn; goeng lij rox guhsaeg, de saeg gij buhvaq seuqseuq saksak, saeg ndaej le lij daeb ndaej cingjcingj caezcaez; goeng lij rox guh hongranz dem, gij deihbanj da gvaq haenx cat dwk rongh ndaej ciuq raen ngaeuz bae……Gou vih miz boux goeng “yienghyiengh rox”ndeu gamjdaengz najrongh.

Muengh daxgoeng mizfuk lumj Doenghaij, naihsouh gvaq Byacungh- nanzsanh, najhai ciengz miz, yiengh- yiengh cungj ndei!

(bouxsij Fouzmingz bouxhoiz Ouh Caijfangh)