Ranz gou youq laj- mbanj, najranz miz diuz gai iq ndeu. Moix roeb liggaeuq coit, coseiq, coroek, cogouj cungj dwg ngoenzhaw. Baez daengz ngoenzhaw, ranz gou lij caengz hai dou, boux vunzlaux ndangcanz fong haiz ndeu couh caeuxcaeux daeuj bakdou gou baijdan, boux vunzlaux neix daih- iek roekcib bi. Aenvih de din fwngz mbouj bienh, ndigah baedauq cungj gwih aen dienhdoengh cisamloek ndeu. Gou haengj heuh de guh “daxgoeng Liuz”.

Gwnz ci daxgoeng Liuz miz song gaiq doxgaiq ceiq dijbauj, it dwg aenfonghaiz de, ngeih dwg aen loengx coux gak cungj hongdawz fonghaiz haenx. Aenvih de doiq vunz yiedcingz, dinfwngz caixhangz, ndigah baez daengz ngoenzhaw, gyoengqvunz cungj humx youq henz ndang de, cingj de fonghaiz, fong daehsaw, nem demhhaiz, hawj haiz hwnj sienq. Mboujdan yienghneix, daxgoeng Liuz sou cienz hix bienzngeiz, miz seiz guh saek di hong nyaeq, de cungj gig noix sou cienz. Miz baez ndeu, diuz sai aen daehsaw gou goenq lo, gaiq sujrag hix vaih lo, dang de bang gou fong ndei le, hawj cienz de, de baenzlawz cungj mbouj sou, yienghneix gou caeuq daxmeh doxyaeng cawx sieng bingj- ganh ndeu hawj de, doeklaeng de lij dwg doiq doxdauq.

Baez ndeu, boux daxheiz daeuj fong haiz ndeu lumz aen daeh’aemq coux haujlai cienz haenx youq gwnz cisamloek de, daxgoeng Liuz ma daengz ranz raen le, lienzmuengz dawz aendaeh gyau hawj daxmeh gou, heuh daxmeh gou siengj banhfap ra boux vunz doek aen daeh haenx, boux daxheiz sou daengz aen daeh’aemq le, hawj de ngeihcib maenz cienz, de baenzlawz cungj mbouj aeu.

Yienznaeuz daxgoeng Liuz caenh dwg boux vunz ndangcanz bingzciengz ndeu, hoeng daj gwnz ndang de gou hag daengz haujlai doxgaiq: It dwg mbouj lau dwgrengz, yaek lumj daxgoeng Liuz ityiengh miz gij cing- saenz gaemgaenj mbouj cuengqsoeng haenx; ngeih dwg guh vunz yaek lauxsaed, mbouj ndaej damdoz siuj- bienzngeiz, yienghneix cij ndaej daengz bouxwnq aeueiq.

Miz vunz naeuz:“Diuzmingh goj- yij iqet, hoeng aenhoenz mbouj ndaej yahcienh.” Seizneix gou daj gwnz ndang daxgoeng Liuz doeg rox gij eiqsei coenz vah neix lo.

(bouxsij Sij Ausez bouxhoiz Goenggen)