Dahnuengx gou ya, de daegbied gyaez daej, daegbied gyaez hozgaek. Bouxwnq baez nyex de, de couh daejnge’nge.

Miz baez ndeu, gou caeuq dahnuengx ngamq swiq ndang sat, dahnuengx couh bae ra daxmeh aeu soujgih, daxmeh unqswnh naeuz: “Mbouj ndaej, ngoenzcog raeuz lij bae hag ni! Vaiq bae ninz lo.” Dahnuengx itmienh guh’unj, itmienh naeuz:“Daxmeh, gouzgouz mwngz lo, gouzgouz mwngz lo, mwngz couh hawj gou ba.” “Ndei ba, hoeng miz gaiq diuzgen ndeu, gou swiq ndang sat, couh aeu soujgih hawj gou, yienzhaeuh bae ninz.” Daxmeh naeuz. “Ndei, ciuq mwngz naeuz.” Dahnuengx han naeuz. Daxmeh dawz soujgih okdaeuj, dahnuengx doq ciengj gvaqbae, couh sikhaek boenz guhcaemz, angqvauvau. Gou raen le, couh caeuq dahnuengx dox- caemh boenz soujgih. Daxmeh bae swiq ndang lo, dou boenz ndaej engq mizyinx lo.

Daxmeh swiq ndang sat, ma daengz ndaw rug, itmienh sousib doxgaiq, itmienh naeuz: “Song lwgniq, yaek hwnj congz bae ninz lo, aeu soujgih hawj gou.” Dah- nuengx gawqyienz naeuz: “Mbouj, gou lij boenz.” Daxmeh youh cam: “Dauqdaej hawj mbouj hawj gou?” “Mbouj hawj.” Dahnuengx naeuz. Gou ganjgaenj ciengj aeu soujgih hawj daxmeh. Daxmeh hwnjheiq naeuz:“Boux mbouj gangj saenq- yungh haenx gou mbouj haengj de.” Dahnuengx engqgya hozgaek, mbwnj bak daejnge’nge, doq daej doq naeuz: “Mbouj haengj couh mbouj haengj be.” Dahnuengx guh gij yiengh mbouj youqgaenj. Daxmeh naeuz: “Cungj naeuz ndei lo, gou swiq ndang ndaej, couh aeu soujgih hawj gou. Guh vunz itdingh yaek lauxsaed, gangj saenqyungh, danghnaeuz mwngz mbouj gangj saenqyungh, mbouj lauxsaed, bouxwnq couh mbouj haengj mwngz, gij doengzhag mwngz hix mbouj caeuq mwngz guhcaemz, mwngz couh godog, godan.” Dahnuengx dingq le cij mbouj daej lo.

Boux neix couh dwg dahnuengx gou, dahnuengx gyaez daej gyaez hozhaek ndeu.

（bouxsij Vangz Veilingz bouxhoiz Goenggen）