Sam bi neix daeuj, ban dou fatseng gvaq haujlai saeh mizyinx. Lumj ndaundeiq gwnzmbwn geq hix geq mbouj liux, lumj dujva ndaw suen ceng hai beij gyaeu. Gienh saeh ceiq ndeiriu haenx couh dwg Cangh lauxsae “gemj biz” lo.

Ngoenzhaenx banringz, gou ciuq- ciengz caeuq gyoengq doengzhag youq ndaw gyausiz gwn ngaiz. Lauxsae hix doengzcaez caeuq dou gwn. Ndaej caeuq lauxsae doq gwn ngaiz doq gangjgoj, gou cungj roxnyinh angq- vauvau. Gou gwn ndaej youh hom youh van, daek haeux daek le vanj dem vanj. Ne, seizneix gou youh bae daek haeux lo, cingqngamj bungqdaengz Cangh lauxsae cingq yaek daek haeux, gou gipmuengz ndoj youq baihlaeng de, hawj de daek gonq. Cijraen de gaem aen vanj iq ndeu daek le sieg byaek ndeu, youh daek le didi haeux. Gvaiq lo, Cangh lauxsae baenzlawz la? Ngoenzneix cij gwn di haeux neix, ndaej imq ha? Gou hwnjbae cam de：“Lauxsae, mwngz vihmaz cij gwn didi haeux ha?”Cangh lauxsae cij doiq gou riu, gijmaz cungj mbouj gangj, hawj gou roxnyinh geizheih dangqmaz. Ngoenz daihngeih, ngoenz daih- sam……laebdaeb geij ngoenz ban- ringz, gou raen Cangh lauxsae cungj dwg yienghneix gwn didi haeux. Bingzseiz gwn ndaej ndoet ndaej, seizneix baenzlawz la? Gou ndawsim gag naeuz：“Cangh lauxsae, mwngz dauqdaej siengj guh gijmaz ha?”

Gou saedcaih nyaenx mbouj ndaej lo, daiq dwk haujlai vwndiz bae cam lauxsae：“Lauxsae, mwngz dauq- daej guh maz da, baenzbingh la? Ngoenzngoenz cij gwn didi haeux, mbouj iek ha?”Lauxsae yawj coh gou, lwgda ronghrikrik, de riu dwk naeuz：“Lauxsae biz lai, gyoengq doengzhag cungj mbouj maij yawj gou lo, ndigah, gou gietsim aeu gemj biz.”Dwg ha, Cangh lauxsae dou, fajnaj luenzlu, baez riu hwnjdaeuj, lumj ndit ciuq yienghneix ronghsagsag. Mboujgvaq dwg gaenh bi neix daeuj, de cingqcaen dwg miz di biz lo. Dingq daxmeh gangj, baezgonq hwnj gunghgaihgo seiz, de seiqlengq cawx mbouj ndaej buhvaq hab ndang youh habsim, mbouj ndaej mbouj cam doengzsaeh ciq le dauq buhsihcangh ndeu ne. Gou fwt rox lo, w, yienzlaiz Cangh lauxsae dwg vih dou gemj biz ha! Cangh lauxsae ha Cangh lauxsae, youq ndawsim gou mwngz ceiq gyaeundei lo. Couhcinj mwngz miz song bak gaen, dou hix maijgyaez mwngz ha! Cangh lauxsae, vihmaz aeu gemj biz ne? Iek ndaej nanzyouq lai lo.

Cangh lauxsae, mwngz caen gaeuq huk ha!

(bouxsij Cangh Cinz bouxhoiz Ouh Caijfangh)