Bihaenx sujgyaj, daxboh daxmeh bauqmingz hawj gou hag youzraemx. Daengz guenjyouz- raemx, gyaulen cam gou: “Mwngz miz gingniemh youzraemx lwi?” Gou ndawsim siengj, youzraemx miz maz nanz lo, mbouj couh dwg youq ndaw raemx baeuh raemx ma! Gou daeuj youz hawj mwngz yawjyawj! Gou mbeihung diuq roengz raemx bae. Mbouj liuh daengz gou gingqyienz lumz mbaetheiq, doeklaeng lienz gwn geij gaemz raemx, gaenlaeng deng gyaulen rag hwnjdaeuj. Gou yawj- yawj seiqhenz, gyoengqvunz ca mbouj lai bouxboux cungj yawj gou. Gou ndawsim siengj, ngoenzneix gou vutnaj lai lo. Ndigah, ngoenzde gou cungj mbouj miz simgei hag youzraemx.

Ngoenz daihngeih, daxboh coi gou bae hag youzraemx, gou naeuz: “Gou mbouj haengj bae gizhaenx ne!” Daxboh lumj yawj rox gij simgei gou, doiq gou naeuz: “Siengj hag rox hag ndei youzraemx, couh giemhaw di, mbouj dwg miz coenz vah ndeu naeuz ‘giemhaw sawj vunz cinbu’ ma.” Gou lumjbaenz rox eiqsei coenz vah neix lo, sikhaek bae hag youzraemx. Ngoenz ndeu, song ngoenz…… aen singhgiz he gvaqbae lo, gou ngoenz beij ngoenz hag ndaej ndei. Gyaulen doiq gou naeuz: “Mwngz caen coengmingz, ngamq hag geij ngoenz couh hag ndaej baenz ndei!” Gou ndawsim gig angq, nyaenx mbouj ndaej riu lo.

Ginglig hag youzraemx hawj gou rox aen dauhleix he: Giemhaw cijndaej hag daengz bonjsaeh, cijndaej guh ndei moix gienh saeh.

(seiq neinzgaep Cau Gyahloh)