Nae, gou gop mwngz youq ndaw fwngz gou, mbaeumbengmbeng, mbaeumbengmbeng……

Nae, mwngz dwg duj va ndeu, mwngz youh dwg duzmbaj saekhau, mbinfoenfoen coh seizdoeng.

Baenz benq baenz benq naefaiq iq mbinyegyeg doek roengzdaeuj, lumj dwg baenz duz baenz duz cinglingz cingqcaih diuqfoux nei. De unqnem- nem lax aennaj gou, youh caemrikrik doek youq gwnz deih, hawj daihdeih daenj hwnj geu buh moq hausak ndeu, hawj aenranz daenj hwnj aen mauh hausak ndeu. Naefaiq iq doek youq gwn nyefaex, baenz naed baenz naed baizdoih dwk, dwg mbouj dwg cingq lienh dijcauh ni? Yawj coh gizgyae, gwnz daihloh hausaksak, daj gyae yawj lumj haeuj daengz diegsien fwjhau hopheux ityiengh.

A! Gij nae seizdoeng bineix caen gyaeu ho! Gij yienghceij naefaiq caen lai ha! Miz yiengh va, yiengh roekbien, yienghlimq……. Baezgonq daj gyae- gyae yawj naefaiq cij dwg baenz naed baenz naed iq saekhau, seiz- neix baenzneix gyawj ngonzyawj, gij yienghceij naefaiq caen gyaeu! Gvaiq mbouj ndaej naefaiq baenzneix simgip mbindoek roengzdaeuj, yienzlaiz dwg siengj yiengq gyoengqvunz langhbaij aenndang gyaeuget de ha!

Caiq yawj ndaw hagdangz, gyoengq doengzhag youq itheij doi vunznae, hoenx ciengqnae, guhcaemz haisim dangqmaz! Gyoengqde ndaw fwngz gaem nae, baenj baenz baenz aen baenz aen giuznae lumj yiengh mandouz nei, swnh bouxwnq seiz mbouj haeujsim, “dug” sing ndeu boemz youq gwnz ndang mbouxwnq. Laeq lwgnyez boemz vunz haenx riugakgak, laeq lwgnyez deng boemz haenx gyajcang fatheiq, da’myonz de song mbat, sikhaek fanjhoenx, song boux couh yienghneix guhcaemz angqvanvan.

Caiq yawj baihhaenx, geij boux doengzhag iq caezsim caenhrengz doi aenndang vunznae, youh itheij ringx aen giuznae hung ndeu, cang hwnj aenndang vunznae bae, aeu gaiqgau guh cehda, yienzbit guh aenndaeng, caiq aeu mbaw faex ndeu cuengq youq laj ndaeng guh conghbak, ha! Boux vunznae ndeu couh yienghneix doi baenz lo.

Gou youq gwnz roen iq, baez yamq baez yamq caij nae doxbae, vunqdin baihlaeng lumj baenz roix baenz roix yaemfouz saetdoengh, ciengq gij go vuenheij haenx.

Nae, gou yo gij gingjsaek lumj gojlwgnyez mwngz youq ndawsim gou.

(bouxsij Lij Binghcenj boux- hoiz Goenggen)