Seiq bi gaxgonq, aen seiqgyaiq iq gou cij miz daxboh daxmeh、daxgoeng daxbuz caeuq gou. Miz mboengq he, gou raen aendungx daxmeh yied daeuj yied hung. Daxboh lwnh gou, ndaw dungx daxmeh ndoj miz lwgnding he. Gou ngeiz lo.

Cib nyied miz hwnz ndeu, canghyw nyoengx daxmeh gou haeuj aen fuengzsoujsuz bae, dou youq bakdou simgip caj dwk. Gou dinghdingh naengh youq, yawj gij yiengh gyoengqde gaenjcieng haenx, gou gag roxnyinh miz cungj saeh doiq gou mbouj ndei he. Gou gag siengj, miz vunz yaek baen gij gyaez vunz ndaw ranz gyaez gou haenx bae lo! Baezlaeng, gou mbouj ndaej boux dog gwn gij gagaeq ndei gwn haenx lo, mbouj ndaej boux dog ciemq aenrungj daxmeh lo, mbouj ndaej gag yawj dungvaben ndei yawj haenx lo…… Gou yied siengj yied doeknaiq, yied siengj yied simliengz, gaemxgienz couh gag gaem ndaet bae.

Gvaq diemj cungj he, husw nyoengx aen congzlwgnding he okdaeuj lo, daihgya ganjgip gvaqbae yawj. Dwg lwgsai! Bouxboux cungj angqvauvau, gou cix lumj lwggyax he, deng vunz vut haeuj gungxgok bae nei. “Daeuj yawj daegnuengx!” Sing daxboh dwk- byoengq aen seiqgyaiq caemdingh gou. Gou yawjraen daegnuengx gwnz congz: Aennaj maeqsisi, lwgdin biznwtnwt, de ninz ndaej geijlai van ha. Gou nyaenx mbouj ndaej iet fwngxyinx haeuj fajfwngz unqet daegnuengx bae. De gingqyienz gaemdawz lwgfwngz gou, gaem ndaej gig ndaet! Sawqmwh, aenndang gou raeujrubrub, haxbaenh mboujonj, dahoengz haenx cungj vut daengz giz gyae bae lo, ndawsim gou cijmiz gyaez caeuq ndiep lo!

Daj ngoenzhaenx hwnj, aen seiqgyaiq iq gou conh ok boux vunz- moq he——daeg- nuengx diuqbeiz gou.

(seiq nienzgaep Vangz Yezyouz)