Youq ndaw aen ndoeng hung haenx, miz duz guk hung ndeu, byawz raen de cungj lau, aenvih dangzheuj de gig raeh.

“Hw, go faex beij diuzsaeu lij hung haenx, duzguk hung heuj baez gaet couh goenq lo, caen dwglau.” Duzlingz iq iet linx naeuz.

“Duzguk hung nyaij diuz dietganj couh lumj gwn mienhdiuz nei……” Duzdouq iq mienh gangj mienh got dawz gyaeuj swhgeij.

Hoeng, duznyaenma iq cix naeuz:“Sou lau de, gou mbouj lau! Gou yaek ciemz dangzheuj de liux bae!”

“Ha ha ha……” Daihgya cungj riuhaha, byawz cungj mbouj saenq gij vah nyaenma.

“Cej daihbauq, cej daihbauq!” “Yi, naj mbouj rox mong, naj mbouj rox mong!” Duzlingz iq caeuq duzdouq iq cungj roxnyinh duznyaenma ndeiriu dangqmaz.

“Mbouj saenq gou? Gvaqlaeng sou couh rox lo.” Duznyaenma bekbek aek byaij bae lo.

Hw, nyaenma caen bae ra duzguk hung lo, de dawz aen hab hung he daeujdaengz ranz duzguk, naeuz: “Daihvuengz ha, gou miz yiengh doxgaiq ndeu ndei gwn dangqmaz, gou dawz daeuj hawj mwngz gwn.”

Dwg dangz! Neix duzguk lienz raen cungj mbouj caengz raen gvaq, engq gaej gangj ndaej gwn gvaq lo. De dawz naed dangz oet haeuj bak bae, ha, diemzsisi, van raixcaix!

Doeklaeng, nyaenma ciengz- ciengz soengq dangz hawj duzguk, duzguk gwn naed youh naed, couh lienz ninz seiz ndaw bak lij hamz miz dangz.

Seizneix, baengzyoux duzguk saeceij rox le, gienq de naeuz: “Mwngz gwn dangz lai lai, youh mbouj catheuj, heuj mwngz couh yaek naeuh caez bae. Duznyaenma ceiq vaddaeuz, mwngz gaej deng yaeuh lo. ”

“W.” Duzguk han naeuz. De ngamq yaek bae catheuj, nyaenma haeujdaeuj naeuz: “A, danghnaeuz mwngz catheuj, gij dangz youq gwnz heuj mwngz cungj deng cat deuz lo. Geijlai hojsik ha. ”

“Hoeng saeceij naeuz gwn dangz lai heuj couh naeuh bw. ”

“Ai, heuj bouxwnq lau dangz, heuj mwngz baenz raeh, lienz diuz dietganj cungj haeb ndaej goenq, lau gijmaz?”

“Docih, docih. ”Duzguk goemq bak naeuz.

Gvaq mbouj geij nanz, heuj duzguk in lo.

Nyaenma bang duzguk yawj heuj de, duzguk baez aj bak, nyaenma couh swenj hwnjdaeuj:“Aeyo, dangzheuj mwngz yaek ciemz bae cij ndaej. ”

“A!” Duzguk mbe aenbak, it- mienh gyangzgwdgwd, itmiemh naeuz:“Ai, cijaeu mbouj in, ciemz……couh ciemz ba……”

Heiyo heiyo, nyaenma haenq- rengz dawz heuj duzguk baez diuz baez diuz ciemz roengzdaeuj, lij miz diuz he couh ciemz liux lo, hoeng, nyaenma gaenq mbouj miz rengz lo.

Hei, miz banhfap lo! Nyaenma aeu diuzmae daeuj, gyaeuj he cug youq gwnz heuj duzguk, gyaeuj he cug gwnz faex bae. Yienzhaeuh de dawz aen bauq cuengq henz dujrwz duzguk bae, baez cit feiz, bung……“Aiyo!” Duzguk deng hwk dwk fandingqdaeuj bae, diuz heuj haenx hix doek roengzdaeuj lo.

Ha ha ha, duzguk hung neix diuz heuj he hix mbouj miz lo, gangj vah laeuhrumz foedfoed, de lij doiq nyaenma naeuz: “Lij dwg mwngz ceiq ndei, youh soengq dangz hawj gou, youh bang gou ciemz heuj in bae, docih docih!”

（Vujsenh Yen Dungzlingj Cin Vujhoz Siujyoz haj nienzgaep Hoz Munggiz hoiz bouxson Vangz Meiginz 武宣县桐岭镇五和小学五年级 何梦琪翻译 指导老师 黄妹琴）