Vunz gyaep gaeq caezgya cungj rox, hoeng byawz dingqgangj gvaq“gaeq gyaep vunz”ne? Mwngz gaej riu, cungj saeh “boihseiz” neix couh fatseng youq ndang gou.

Daxbuz siengj gaj duz gaeqboux biz ndeu hawj gou gwn, au gou ngamq siengj bae gaeb gaeq, gou gipmuengz laengz youq de：“Au ndei, lajmbwn mwngz ceiq dwggyaez lo! Gaeb gaeq cungj saehndei neix couh gyau hawj gou bae guh ba!”Au dingq le sikhaek couh dapwngq lo.

Gou vid genbuh hwnj, yawj cinj duz“rouj nding”youh biz youh maengh haenx coemj gvaqbae, hoeng duz gaeqboux habdai haenx deuz ndaej gig vaiq, yaepyet couh buet bae lo, gou dauqfanj ngaiz laemx ndaej “bak henx namh” bae! Yienghneix gou hozndat lo, lumj fatbag nei gyaep hwnjbae, aenbak lij mbouj dingz hemq naeuz：“Heuh mwngz buet! Heuh mwngz buet!”Hoeng gyaep le buenqngoenz, lienz diuz bwngaeq ndeu cungj mbouj bungq ndaej deng. “Rouj nding” gijmaz saeh cungj mbouj miz, gou dauq baeg ndaej daengx ndang ok hanh liux, ajngaeb huhu.

Seizneix, daxgoeng ndenq aen baunoh ndeu hawj gou, gou doq gwn doq gyaep, miz gwn le buet hwnjdaeuj engqgya miz rengz lo. Duzgaeq lumj nyouq daengz gij feihhom baunoh nei, cienq ndang gvaqdaeuj. Gou laihnaeuz de buet mbouj ndaej lo, couh hehe caeg riu song sing, yiengq baihnaj byaij le song yamq, hoeng duz gaeqboux hix iet hoz yiengq baihnaj byaij le song yamq. Gou roxnyinh“geizheih”dangqmaz, youh yiengq baihnaj doenq le geij yamq, byawz rox, ndaek neix gingqyienz cigsoh yiengq gou coemj gvaqdaeuj, dot gwn aenbau ndaw fwngz gou.

“Meh ha!” Gou hai din couh buet, doq buet doq daej, “Sou vaiq daeuj ha, duzgaeq dot vunz lo!”Au dingqnyi le buet okdaeuj, gyaep duz gaeqboux bae.

Gou gaem mug ndeu gaem raemxda ndeu daejswdswd dawz gienh saeh “yungyiemj” neix lwnh hawj vunz ndaw ranz nyi, byawz siengj daengz, gou cix bienqbaenz “vahriu”lo：Daxmeh riu ndaej hwet gungj, daxbuz riu ndaej raemxda lae, daxgoeng riu ndaej aenbak haep mbouj hwnj, au hix ndoj youq henz caeg angq……

(bouxsij Fouzcoh bouxhoiz Ouh Caijfangh)