Lienzdaemh doek baenz geij ngoenz fwn, mbwn dauqdaej ronghcingx lo. Daxboh daiq gou bae epbya.

Daeujdaengz henz daemz, daxboh aeu ganjset hawj gou, ngaeu dawz duzndwen, caj gijneix cungj guh ndei le, gou gaemdawz ganjset, gveng coh ndaw daemz bae. Yienzhaeuh dinghcubcub naengh youq gwnz daengq iq, da mbouj yaep cimyawj fagsep, deq bya dawzset. Mbouj geijlai nanz, ganjset doenghrebreb geij baez, ndaw hoz gou gag riungoemx, duzbya baenzneix vaiq couh dawzset lo, yienghneix gou doq deq mbouj gib rag ganjset hwnjdaeuj, ya——gwnz set hoengqvakvak, mboujdan mbouj miz bya, couh lienz gij ngaeuh hix mbouj raen lo! Daxboh raen gou doeknaiq swiswi, nai gou naeuz:“Gaej doeknaiq, epbya yaek hozraez, hozgaenj gwn mbouj ndaej daeuhfouh ndat. Lij miz, yaek deq gyoemset sawqmwh caem doxroengz, mwngz cij ndaej rag set hwnjdaeuj.” Baezneix, gou maqmuengh rim dungx, dauqlingh ngaeu dawz duzndwen, gveng fagset roengz ndaw daemz bae. Gou naengh youq gwnz daengq iq, naihsim deq bya dawzset, gvaq le daih’iek ngeihcib faen cung, gou yawjraen najraemx fouz hwnj baenz gvaengx baenz gvaengx gvaengzraemx, lij mauh hwnjdaeuj baenz aen baenz aen bopraemx, riengzdwk, gyaemset sawqmwh caem doxroengz, gou gikdoengh raixcaix, neix mbouj dwg gij yienhsiengq daxboh naeuz bya dawzset ha? Yienghneix, gou mbaetcaw mbaetheiq, song fwngz gaem maenh ganjset, yunghrengz rag coh baihgwnz, ha——duz bya iq saetroebroeb haenx dawzset lo! Gou angqfwngfwng hemq: “Gou ep dawz bya lo! Gou ep dawz bya lo!”

Gaenlaeng gou yied ep yied swnhfwngz, ngamq byongh ngoenz couh ep ndaej cibgeij duz bya.

Daengngoenz roengzbya, gou caeuq daxboh cangrim ma ranz.

(bouxsij Siuh Yiliuj bouxhoiz Goenggen)