Moubiz iq baema daengz ranz couh vava daej hwnjdaeuj lo. “Gou daiq biz lo, va!”

Daxmeh duzmou gig geizheih, gangj:“Biz miz maz mbouj ndei, bouxlawz gangj mwngz lo, gou bae naeuz de!”

Moubiz iq mbouj gangj vah, cijguenj daej, daxmeh duzmou gip lo, “dwg maxdah gangj mwngz la? Dwg mbouj dwg? Duz maxdah dwgcaengz neix, bonjlaiz de couh buet mbouj vaiq, de nyengh gangj dwg max, gou sikhaek bae sik bak de.”

Moubiz iq gangj:“Mbouj, mbouj, mbouj dwg maxdah, mbouj dwg maxdah.”

“Mbouj dwg maxdah? Haenx haengj- dingh dwg gaeqmeh geq, dwg mbouj dwg? Duz gaeqmeh geq haenx cienmonz gangj vunz, de swhgeij youh daemq youh biz lumj aen lwgfaeg nei, gou bae euj fwed de!”

Moubiz iq daej dwk gangj:“Mbouj dwg mbouj dwg, mbouj dwg gaeqmeh geq, mbouj dwg”.

Daxmeh duzmou geizgvaiq lo, gangj: “O, haenx haengjdingh dwg manaez ndaem, manaez……”Baez ngeix daengz manaez ndaem, daxmeh duzmou ndawsim gag saenz, bi’gvaq de bungzdaengz manaez ndaem, aenrwz cengdi deng haeb bae, daxmeh duzmou naemjnaemj le gangj: “Suenq lo, hawj vunz bae gangj ba! Mwngz youh mbouj noix saek diuz bwn.”

Moubiz iq gangj: “Mbouj dwg lwi, mbouj dwg lwi, mbouj dwg manaez ndaem.” “Yienghneix dwg bouxlawz, mwngz vaiq gangj ya!” Daxmeh duzmou giplwlw cam dwk..

“Dwg dwg daeggo vaiz iq gangj.” Moubiz iq daejsaekwk uet raemxda gangj.

Daxmeh duzmou huj lo, lienzmuengz buet daengz ranz Daeggo vaiz iq cam: “Mwngz guhmaz gangj lwg gou biz lai, hawj lwg gou daej cungj mbouj dingz bae.”

Daeggo vaiz iq gangj: “Gou dingqnyi dahcej duzgaeq hung gangj hane.”

Daxmeh duzmou daiq daeggo vaiz iq ra daengz dahcej gaeq hung, dahcej gaeq hung gangj: “Gou dingq mehliuz duzbit hung gangj hane.”

Daxmeh duzmou daiq daeggo vaiz iq、dahcej gaeq hung ra daengz mehliuz duzbit hung, mehliuz duzbit hung riu dwk doiq daxmeh duzmou gangj: “Mwngz lumz la, mbouj dwg mwngz caen bak doiq gou gangj, mou iq daiq biz lo, aeu gemj biz lo?”

“Ha!” Daxmeh duzmou fwt ngeix hwnjdaeuj lo, dwg swhgeij lwnh hawj mehliuz duzbit nyi dahraix, de cij ndaej naj nding gangj: “Deng lo deng lo, lwg gou dwg biz di, gemj di biz hix mbouj loek.”

Daeggo vaiz iq、dahcej duzgaeq hung caeuq mehliuz duzbit hung cungj haha riu hwnjdaeuj.

(Vujsenh Yen Dungzlingj Cin Sinh- lungz Siujyoz roek (4) ban Veiz Cuhvaz hoiz 武宣县桐岭镇新龙小学六（4）班 韦淑华 翻译 指导老师 覃 瑜)